విజయవాడ స్వర్ణప్యాలెస్ అగ్ని ప్రమాద దుర్ఘటనకు సంబంధించి విచారణకు ఆటంకం కలిగిస్తే ఎలాంటివారికైనా నోటీసులు ఇవ్వడానికి వెనుకాడబోమని ఏసీపీ సూర్యచంద్రరావు తేల్చి చెప్పారు. ఈ మేరకు ఏసీపీ సూర్యచంద్రరావు ఆదివారం మీడియాతో మాట్లాడుతూ.. ‘‘స్వర్ణప్యాలెస్ దుర్ఘటనలో రమేష్ ఆసుపత్రి యాజమాన్య వ్యవహారాన్ని సీరియస్గా తీసుకున్నాం. ఇప్పటి వరకు డాక్టర్లు మమత, సౌజన్యను విచారించాం. విచారణకు ఆటంకం కలిగిస్తే హీరో రామ్కి కూడా నోటీసులు జారీ చేస్తాం’’ అని హెచ్చరించారు. రమేష్ అల్లుడు కళ్యాణ్ చక్రవర్తి ఆదివారం విచారణకు రావాల్సి ఉందని, అయితే ఆరోగ్యం బాగోలేదు రెండు వారాలు క్వారంటైన్లో ఉండాల్సి వస్తోందని మెయిల్ చేశారని ఏసీపీ చెప్పారు. ఆయన సోదరుడి ఆరోగ్యం కూడా బాగోలేదని, ఇంట్లోనే అందుబాటులో ఉంటానని చెప్పారన్నారు. తనను ఇంట్లోనే విచారించాలని కోరారన్నారు. నిజంగానే వారికి ఆరోగ్యం బాగోలేదా లేక నోటీసులు తీసుకుని విచారణకు ఆటంకం కలిగించడానికి ఈ విధంగా చేస్తున్నారా అనే విషయాన్ని పరిశీలిస్తున్నట్లు చెప్పారు. వృద్ధాప్యంలో ఉన్నవారు విచారణకు రాలేకపోతే ఇంటికే వెళ్లి విచారిస్తామని, కానీ మిగిలిన వారు ఎట్టిపరిస్థితుల్లోనూ విచారణకు హాజరు కావాల్సిందేనని ఏసీపీ సూర్యచంద్రరావు స్పష్టం చేశారు. ప్రమాదానికి పూర్తి బాధ్యత ఎవరిది అన్నది దర్యాప్తులో తేలుతుందన్నారు. డాక్టర్ రమేష్.. కలెక్టర్ కార్యాలయానికి వచ్చి అక్కడి నుంచి పరారయ్యారని ఏసీపీ తెలిపారు. మొబైల్ స్విచ్ ఆఫ్ చేసి, సొంత కారును అక్కడే వదిలేసి మరో కారులో వెళ్లిపోయారని చెప్పారు. ఆయన కుటుంబ సభ్యులు కూడా లేరన్నారు. పరారీలో ఉండి దొంగచాటుగా ఆడియో టేపు విడుదల చేసి విచారణకు సహకరిస్తామని చెప్పడం సరికాదన్నారు. 91 సీఆర్పీసీ కింద ఆయన వద్ద ఉన్న డాక్యుమెంట్లను తీసుకు రావాలని రమేష్కు నోటీసు ఇస్తామని.. ఆక్సిజన్ సిలిండర్లు, ఫార్మసీ వంటి వాటికి ఏయే ఎంవోయూ చేసుకున్నారో తమకు తెలియజేయాలన్నారు. ప్రభుత్వం నుంచి ఎలాంటి అనుమతులు తీసుకున్నారో చూపించాలని తెలిపారు. ట్వీట్లు, ఆడియో టేపులు పంపటం మాని ఆధారాలు ఉంటే విచారణకు హాజరు కావాలని హీరో రామ్తో పాటు డాక్టర్ రమేష్కు ఏసీపీ సూర్యచంద్రరావు చురకలంటించారు.
from Telugu Cinema News | తెలుగు సినిమా న్యూస్ | Latest Telugu Cinema News in Telugu https://ift.tt/2Y8TWtQ
No comments:
Post a Comment