HBD Mahesh Babu: అందుకే ఆయన సూపర్ స్టార్.. ఆ రోజు నుంచి నేటి వరకు! ఈ శ్రీమంతుడికి సరిలేరు ఇంకెవ్వరూ..

సూపర్ స్టార్ అభిమానులు ఎంతగానో ఎదురు చూస్తున్న పండగ రోజు రానే వచ్చింది. నేడు (ఆగస్టు 9) సూపర్ స్టార్ 45వ పుట్టిన రోజు. ఈ సందర్భంగా ఆయనకు పుట్టిన రోజు శుభాకాంక్షలు వెల్లువెత్తుతున్నాయి. బాలనటుడిగా సినీ కెరీర్ ఆరంభించి అంచెలంచెలుగా ఎదిగి తెలుగు చిత్రసీమలో తండ్రికి తగ్గ తనయుడిగా గొప్ప పేరు సంపాదించారు మహేష్ బాబు. సినిమాల పరంగా కెరీర్‌లో ఎన్నో ఒడిదొడుకులు ఎదరురైనా కూడా అన్నింటికీ తట్టుకొని తనకు సరిలేరు ఇంకెవ్వరూ! అనే పేరు తెచ్చుకున్నారు. మరి, ప్రస్తుతం టాలీవుడ్ సూపర్ స్టార్‌గా ఓ వెలుగు వెలుగుతున్న మహేష్ సినీ జర్నీ, జీవిత విశేషాలను ఓ సారి చూద్దామా.. ఘట్టమనేని వారసుడిగా బాలనటుడిగా సినీ కెరీర్ ఆరంభించారు మహేష్ బాబు. తండ్రి కృష్ణ 'నీడ' సినిమాతో బాలనటుడిగా కెమెరా ముందుకొచ్చి 8 కి పైగా సినిమాల్లో నటించాడు. ఆ తర్వాత 1999 సంవత్సరంలో 'రాజకుమారుడు' సినిమాతో హీరోగా ఎంట్రీ ఇచ్చి ఈ 20 ఏళ్లలో టాలీవుడ్ టాప్ స్టార్ అయ్యారు. 2003లో వచ్చిన 'నిజం' సినిమాకు గాను మొదటి సారి ఉత్తమ నటుడిగా నంది పురస్కారం అందుకున్నారు. తర్వాత 2005 లో వచ్చిన అతడు, 2011లో వచ్చిన దూకుడు, 2015లో వచ్చిన శ్రీమంతుడు చిత్రాలకు కూడా ఉత్తమ నటుడిగా నంది పురస్కారాలు అందుకొని అశేష అభిమాన వర్గాన్ని కూడగట్టుకున్నారు మహేష్. విలక్షణ పాత్రలు పోషిస్తూ ఎలాంటి పాత్రలో అయినా ఒదిగిపోయే నటుడిగా మహేష్ బాబుకి ఓ ప్రత్యేక గుర్తింపు ఉంది. ఆయన కెరీర్‌లో వచ్చిన ''టక్కరి దొంగ, శ్రీమంతుడు, స్పైడర్, నేనొక్కడినే, భరత్ అనే నేను, మహర్షి'' సినిమాలు దేనికవే ప్రత్యేకం. జయాపజయాలతో సంబంధం లేకుండా తెలుగు చిత్రసీమలో తాను మాత్రమే చేయగలను అనేలా ఈ సినిమాలతో సత్తా చాటారు మహేష్. ఆయన కెరీర్‌‌ని మలుపుతిప్పిన సినిమాలుగా ''అతడు, పోకిరి'' మహేష్ అభిమానుల గుండెల్లో చిరస్థాయిగా నిలిచిపోతాయి. అతడు సినిమాకు గాను ఉత్తమ నటుడిగా నంది అవార్డు, పోకిరి సినిమాకు గాను ఉత్తమ తెలుగు నటుడిగా ఫిలిం ఫేర్ అవార్డు అందుకున్నారు మహేష్ బాబు. ఇక ఈ ఏడాది ఆరంభంలోనే 'సరిలేరు నీకెవ్వరు' సినిమాతో ఇండస్ట్రీ హిట్ కొట్టి సత్తా చాటిన మహేష్ బాబు.. ప్రస్తుతం పరశురామ్ దర్శకత్వంలో 'సర్కారు వారి పాట' మూవీ చేస్తున్నారు. ఇటీవలే విడుదలైన ఈ మూవీ ప్రీ లుక్ పోస్టర్ ఆయన ఫాన్స్‌లో సరికొత్త ఉత్సాహం నింపింది. ఈ రోజు మహేష్ 45వ పుట్టినరోజు కానుకగా ఈ సినిమా నుంచి మోషన్ పోస్టర్ రిలీజ్ చేయనున్నారు మేకర్స్. అలుపెరగని సినీ ప్రయాణం కొనసాగిస్తూనే సామాజిక మాధ్యమాల్లో చురుకుగా ఉండటం మహేష్ మరో స్పెషాలిటీ. ఏ మాత్రం సమయం దొరికినా తన భార్య నమ్రత, పిల్లలు గౌతమ్, సితారలతో టూర్స్ వేస్తూ ఆ విశేషాలను అభిమానులతో పంచుకుంటూ ఉంటారు మహేష్. సోషల్ మీడియా హ్యాండిల్స్ పరంగా కూడా మహేష్ క్రేజ్ ఓ రేంజ్‌లో ఉంటుంది. భారీ ఫాలోయింగ్‌తో ఈ ఏడాది పుట్టినరోజు సందర్భంగా 16 మిలియన్ల బర్త్ డే ట్వీట్ పొంది వరల్డ్ రికార్డు సృష్టించారు మహేష్. మన సూపర్ స్టార్‌లో దాతృత్వ లక్షణాలు కూడా ఎక్కువే. 2016 సంవత్సరంలో ఆంధ్రప్రదేశ్ రాష్ట్రం నుంచి బుర్రిపాలెం, తెలంగాణ రాష్ట్రం నుంచి సిద్దాపురం గ్రామాలను దత్తత తీసుకున్న ఈ శ్రీమంతుడు.. ఆ గ్రామాల అభివృద్ధిలో కీలక పాత్ర పోషిస్తూ అక్కడి ప్రజలకు అండగా నిలుస్తున్నారు. అదేవిధంగా ఎంతోమంది చిన్నారులకు హార్ట్ ఆపరేషన్స్ చేయించి మానవత్వం చాటుకున్నారు మహేష్. ఆర్ధికంగా బలంగా లేని కుటుంబాలకు తన సొంత ఖర్చులతో వైద్య సేవలు అందిస్తూ నిజ జీవితంలోనూ గొప్ప వ్యక్తిగా కీర్తించబడుతున్నారు సూపర్ స్టార్. మరి సూపర్ స్టార్ బర్త్ డే అన్నాక రెండు తెలుగు రాష్ట్రాల్లో వేడుకలు హోరెత్తిపోవాల్సిందే కదా!. అయితే అందుకు సిద్దమైన ఫ్యాన్స్‌ని రిక్వెస్ట్ చేస్తూ ఈ ఏడాది ఎవ్వరూ సామూహిక వేడుకలు జరపొద్దని కోరారు మహేష్. కరోనా విలయతాండవంలో అంతా జాగ్రత్తగా ఉండాలని, ఎవ్వరూ బయటకు రావొద్దని, తనపై అందరి అభిమానం ఎప్పుడూ ఉండాలని కోరారు. ఈ రియల్ సూపర్ స్టార్‌కి మీ, మా 'సమయం తెలుగు' తరఫున జన్మదిన శుభాకాంక్షలు తెలుపుతూ మహేష్ సినీ కెరీర్‌లో ఇంకా ఎన్నో మైలురాళ్ళు దాటాలని కోరుకుంటున్నాం.

from Telugu Cinema News | తెలుగు సినిమా న్యూస్ | Latest Telugu Cinema News in Telugu https://ift.tt/3kkW5My