ప్రస్తుతం టాలీవుడ్లో మూవీ ఆర్టిస్ట్స్ అసోసియేషన్ (మా) ఎన్నికల వ్యవహారం ఎంతటి వివాదాస్పదంగా మారాయో అందరికీ తెలిసిందే. ఎన్నడూ లేనట్టుగా ఈ సారి బరిలోకి చాలా మంది దిగుతున్నారు. ప్రకాష్ రాజ్, మంచు విష్ణు, హేమ, నటుడు సీవీఎల్ నరసింహారావు, జీవిత ఇలా అందరూ అధ్యక్ష బరిలోకి దిగారు. వీరిలో మరీ ముఖ్యంగా అంటే ప్రకాష్ రాజ్, మంచు విష్ణుల మధ్యే పోటీ ఉండబోతోన్నట్టు కనిపిస్తోంది. ప్రకాష్ రాజ్కు మెగా క్యాంప్ మద్దతు ఉందని తెలిసిపోతోంది. తన ప్యానల్ను ముందుగా ప్రకటించి ప్రకాష్ రాజ్ అందరినీ ఆశ్చర్యపరిచారు. ప్యానల్ను ప్రకటించిన సమయంలో చేసిన కామెంట్లు అందరినీ ఆశ్చర్యపరిచాయి. తాను ప్రకాష్ రాజ్కు మద్దతు ఇస్తున్నాను.. ఎన్నో ఏళ్ల నుంచి చూస్తున్నాను.. ఎన్నో గ్రామాలను దత్తత తీసుకున్నారు. కరోనా కాలంలో ఎంతో మందికి ఆశ్రయం కల్పించారు.. షాద్ నగర్లో భూమి అడిగితే పది ఎకరాలు ఇచ్చాను.. ప్రకాష్ రాజ్ అన్ని విధాల సమర్థుడు అంటూ బండ్ల గణేష్ నాడు మాట్లాడారు. అయితే తాజాగా ఓ ఇంటర్వ్యూలో , మా భవనం గురించి మాట్లాడారు. ప్రతీ ఎన్నికల్లో అందరూ కూడా మా భవనం గురించే మాట్లాడతారన్న సంగతి తెలిసిందే. ఈ సారి కూడా అందరూ అదే అంటున్నారు. మంచు విష్ణు అయితే మొత్తం ఖర్చును తానే భరిస్తాను అని చెప్పేశారు. అయితే ఇలా మా భవనం గురించి అందరూ మాట్లాడుతుండటంపై బండ్ల గణేష్ తన అభిప్రాయాన్ని చెప్పుకొచ్చారు. ‘నా దృష్టిలో అయితే ‘మా’కు బిల్డింగే అవసరం లేదు. ఆ భవనం లేకపోయినంత మాత్రానా ఇండస్ట్రీ ఏమీ ఆగిపోదు.. కానీ దాని కంటే ముందుగా చేయాల్సినవి ఎన్నో ఉన్నాయి. 900 మంది సభ్యులున్న ‘మా’లో దాదాపు వంద మంది దారిద్ర్యపు రేఖకు దిగువన ఉన్నారు. నెల అయితే చాలు రెంటు ఎలా కట్టాలో తెలియని పరిస్థితుల్లో ఉన్నారు. అలాంటి వారి కోసం డబుల్ బెడ్రూం ఇళ్లు కట్టించాలి. ప్రభుత్వాన్ని అడిగితే భూమి ఇవ్వదా? అందులో ఈ వంద మందికి ఇళ్లు కట్టించాలి. దానికి మన హీరోలు కూడా ముందుకు వస్తారు’ అని బండ్ల గణేష్ మంచి మాటలు చెప్పారు. మరి బండ్లన్న అభిప్రాయాన్ని ఎవరైనా స్వీకరిస్తారో లేదో చూడాలి.
from Telugu Cinema News | తెలుగు సినిమా న్యూస్ | Latest Telugu Cinema News in Telugu https://ift.tt/3xZU3XK
No comments:
Post a Comment