మా అమ్మ అప్పుడు ఏడ్చింది.. మళ్లీ ‘నాంది’ చూసి ఏడ్చింది: వరలక్ష్మీ శరత్‌కుమార్

తాను తొమ్మిదేళ్లుగా తమిళ ఇండస్ట్రీలో ఉన్నా తెలుగు సినీ పరిశ్రమలో దక్కినంత ప్రేమ అక్కడ తాను పొందలేదని అన్నారు ప్రముఖ నటి వరలక్ష్మీ శరత్‌కుమార్. ఆమె ముఖ్య పాత్రలో నటించిన తాజా చిత్రం ‘నాంది’. అల్లరి నరేష్ హీరోగా నటించిన ఈ సినిమాకు విజయ్ కనకమేడల దర్శకత్వం వహించారు. సతీష్ వేగేశ్న నిర్మాత. ఫిబ్రవరి 19న విడుదలైన ఈ చిత్రం హిట్ టాక్ తెచ్చుకుని బాక్సాఫీసు వద్ద మంచి వసూళ్లను రాబడుతోంది. ఈ సినిమా విజయం సాధించిన సందర్భంగా చిత్ర యూనిట్ ఆదివారం సక్సెస్ మీట్‌ను నిర్వహించింది. ఈ సక్సెస్ మీట్‌లో వరలక్ష్మీ శరత్‌కుమార్ మాట్లాడుతూ.. ‘‘సాధారణంగా నేను మాట్లాడేటప్పుడు ఈజీగా ఫ్లో వచ్చేస్తుంది. కానీ, ఇప్పుడు రావట్లేదు. మొదటిగా మీ అందరికీ చాలా చాలా థాంక్స్. తొమ్మిదేళ్లుగా నేను తమిళ్ ఇండస్ట్రీలో ఉన్నాను. నిజంగా ఇంత ప్రేమ అక్కడ నాకు దక్కలేదు. ఇది నాకు చాలా ఎమోషనల్‌గా, అద్భుతంగా అనిపిస్తోంది. ప్రతిభకు గౌరవం ఇచ్చే ఇక్కడి నిర్మాతలకు, దర్శకులకు, రైటర్స్‌కి అందరికీ థాంక్స్. అక్కడ నాకు చాలా మంది చెప్పారు.. తెలుగు ఇండస్ట్రీకి వెళ్తే రాణిలా చూసుకుంటారు అని. అది నా విషయంలో మరోసారి నిజమైంది. ‘నాంది’ సినిమాను ఇంత పెద్ద హిట్ చేసిన ప్రేక్షకులందరికీ కృతజ్ఞతలు. తెలుగు ఇండస్ట్రీలో నేను కూడా భాగమైనందుకు చాలా సంతోషంగా ఉంది. ఇక, ‘నాంది’ టీమ్ అందరికీ అభినందనలు. విజయ్ విజన్ ఇవాళ నిజమైంది. సతీష్ గారు ఇంకా పెద్ద నిర్మాతగా ఎదగాలి. నిజానికి ప్రీ రిలీజ్ ఈవెంట్‌లో మాట్లాడేటప్పటికి నేను సినిమా చూడలేదు. నా డబ్బింగ్ సీన్స్ మాత్రమే చూశాను. నిన్న రాత్రి చెన్నైలో షో వేసుకుని చూశాను. నేను తమిళంలో చేసిన ‘తారాయి తప్పట్టాయి’ సినిమా చూసినప్పుడు మా అమ్మ ఏడ్చింది. మళ్లీ నిన్న ‘నాంది’ చూసినప్పుడు ఏడ్చింది. సూర్య ప్రకాశ్ క్యారెక్టర్‌తో ప్రేక్షకులు ఎంతో కనెక్ట్ అయ్యారు. చాలా కాలం తరవాత నా పర్ఫార్మెన్స్ చూసి చాలా సంతోషపడ్డాను. ఆద్య పాత్రకు నన్ను ఎంపిక చేసుకున్నందుకు విజయ్‌కు థాంక్స్. అద్భుతమైన నేపథ్య సంగీతం ఇచ్చిన చరణ్‌కు, సినిమాటోగ్రాఫర్ సిద్ధుకి చాలా థాంక్స్. కోర్ట్ రూమ్ సీన్స్ సినిమాటిక్‌గా లేవని చెన్నైలో సినిమా చూసినవాళ్లు అన్నారు. ఈ విషయంలో బ్రహ్మ కడలి గారికి థాంక్స్. సినిమాలో మొదటిగా వచ్చే సీన్‌ను నరేష్‌లా ఎవరూ చేయలేరు. అలా చేయడం చాలా కష్టం. నేను సాధారణంగా ఎమోషనల్ అవ్వను.. కానీ, నరేష్ నన్ను ఏడిపించారు’’ అని అన్నారు.

from Telugu Cinema News | తెలుగు సినిమా న్యూస్ | Latest Telugu Cinema News in Telugu https://ift.tt/37uV3cb