గునుపూడి విశ్వనాథశాస్త్రి.. ఈ పేరు పెద్దగా ఎవరికీ తెలియకపోవచ్చు. ఐరన్ లెగ్ శాస్త్రి అంటే ఎవరైనా ఠక్కున గుర్తు పట్టేస్తారు. దర్శకత్వంలో రాజేంద్రప్రసాద్ హీరోగా తెరకెక్కిన ‘అప్పుల అప్పారావు’ చిత్రం ద్వారా తెలుగు తెరకు పరిచయమైన ఐరన్ లెగ్ శాస్త్రి.. 150కి పైగా సినిమాల్లో నటించి మెప్పించారు. ముఖ్యంగా బ్రహ్మానందంతో కలిసి అనేక సినిమాల్లో ఆయన పండించిన హాస్యం కడుపుబ్బా నవ్విస్తుంది. వారిద్దరి మధ్య వచ్చే కామెడీ సన్నివేశాలు ఇప్పటికీ సినీ ప్రేక్షకులకు వినోదాల విందు పంచుతూనే ఉంటాయి. పశ్చిమ గోదావరి జిల్లా తాడేపల్లి గూడెంకు చెందిన గునుపూడి విశ్వనాథ శాస్త్రి స్వతహాగా మంచి పేరున్న పురోహితుడు. గోదావరి జిల్లాకే చెందిన ప్రముఖ దర్శకుడు ఈవీవీ సత్యనారాయణ స్థానికంగా ఓ శుభ కార్యక్రమానికి హాజరయ్యారు. అక్కడికి పురోహితుడిగా వచ్చిన విశ్వనాథశాస్త్రిలోని హాస్య చతురతను గమనించిన ఆయన ‘అప్పుల అప్పారావు’ సినిమాతో కమెడియన్గా వెండితెరకు పరిచయం చేశారు. మొదటి సినిమాకే ఆయన మంచిపేరు రావడంతో పాటు ఐరన్ లెగ్ శాస్త్రిగా ప్రేక్షకుల మదిలో స్థానం సంపాదించుకున్నారు. అక్కడి నుంచి కొన్నాళ్ల పాటు వెనుదిరిగి చూసుకోవాల్సిన పనిలేకుండా పోయింది. కొన్నాళ్ల తర్వాత సినిమా అవకాశాలు తగ్గిపోవడంతో ఐరన్ లెగ్ శాస్త్రి ఆర్థికంగా ఇబ్బంది పడ్డారు. దీనికి తోడు కుటుంబ సమస్యలు పెరగడంతో మానసికంగా కుంగిపోయారు. ఒకానొక సందర్భంలో హైదరాబాద్లో ఉండలేక సినీ ఇండస్ట్రీని వదిలేసి స్వగ్రామానికి వెళ్లిపోయారు. కుటుంబ పోషణ కోసం తిరిగి పౌరోహిత్యం చేసేందుకు సిద్ధమైనప్పటికీ ఆయన్ని ఎవరూ శుభకార్యాలకు పిలిచేవారు కాదట. ఐరన్ లెగ్ అన్న తన స్ర్కీన్ నేమ్ వల్లే తనకు ఉపాధి కరువైందని విశ్వనాథ శాస్త్రి ఓ సందర్భంలో చెప్పుకొచ్చారు. వచ్చే ఆదాయం కుటుంబ పోషణకు సరిపోకపోవడంతో పాటు, ఊబకాయంతో పాటు వయసు మీద పడుతుండడంతో ఆయనకు పలు అనారోగ్య సమస్యలు మొదలయ్యాయి. Also Read: అయినప్పటికీ ఎలాగోలా వాటిని తట్టుకుని ముందుకు సాగిన శాస్త్రి 2006లో గుండెకు సంబంధిత వ్యాధికి గురయ్యారు. దీంతో తమను ఆర్థికంగా ఆదుకోవాలంటూ ఆయన కుటుంబసభ్యులు అప్పట్లో ప్రభుత్వాన్ని కోరారు. ఐరన్ లెగ్ శాస్త్రి కుటుంబ పరిస్థితి తెలుసుకున్న కొందరు సినీనటులు ఆయనకు కొంత ఆర్థిక సాయం చేశారు. ఈలోగా పచ్చకామెర్లు కూడా సోకడంతో శాస్త్రి ఆరోగ్యం మరింత క్షీణించింది. పరిస్థితి విషమించడంతో చివరికి. జూన్ 19, 2006లో తన స్వస్థలమైన తాడేపల్లిగూడెంలోనే ఐరన్ లెగ్ శాస్త్రి తుదిశ్వాస విడిచారు. అయితే ఐరన్ లెగ్ శాస్త్రి చివరి రోజులు తలుచుకుంటే గుండె తరుక్కు పోతుందని ఇప్పటికీ కొందరు సినిమా ప్రముఖులు గుర్తు చేసుకుంటుంటారు. సినిమాల్లో ఐరన్ లెగ్ పాత్రను ఎక్కువగా దరిద్రానికి, దురదృష్టానికీ సింబాలిక్గా చూపించి నవ్వులు పూయించారు దర్శకులు. నిజానికి అది తెరపై పాత్రే అయినప్పటికీ.. ఆ పేరు ఆయన వ్యక్తిగత జీవితాన్ని తీవ్రంగా ప్రభావితం చేసింది. ఆఖరి రోజుల్లో శాస్త్రి పౌరోహిత్యం చేసుకొని కుటుంబాన్ని పోషించుకుందామనుకున్నప్పటికీ ఐరన్ లెగ్ ఎఫెక్ట్ వల్ల ఎవరూ ఆయన్ని శుభకార్యాలకు పిలిచేవారు కాదట. ఐరెన్ లెగ్ శాస్త్రి మరణానికి సంబంధించిన విషయాలను ఆయన కుమారుడు ప్రసాద్ ఓ ఇంటర్వ్యూలో వెల్లడించారు. తన తండ్రి మరణం తర్వాత ఎదురైన పరిస్థితులను తలచుకొని ఉద్వేగానికి లోనయ్యారు. ‘మా నాన్న ఐరెన్ లెగ్ శాస్త్రి చాలా సినిమాల్లో నటించినా పెద్దగా ఆస్తులు కూడబెట్టుకోలేకపోయారు. అవకాశాలు తగ్గడంతో హైదరాబాద్ నుంచి సొంతూరు తాడేపల్లిగూడెంకు వచ్చేశాం. మా కుటుంబం పౌరహిత్యంపై ఆధారపడటంతో కష్టంగా ఉండేది. నాన్న శరీరం భారీగా పెరిగిపోయింది. ఆరోగ్య సమస్యలు తలెత్తాయి. అలాంటి పరిస్థితుల్లో ఆయనకు గుండెపోటు వచ్చింది. ఆ సమయంలో మేమంతా హైదరాబాద్లో ఉండటంతో మా బంధువులు ఆయన్ని హాస్పిటల్లో జాయిన్ చేశారు.. మరుసటి రోజు ఉదయం మేం తాడేపల్లిగూడెం చేరుకుని హాస్పిటల్కు చేరుకునే సరికే ఆయన కన్నుమూశారు. ఆస్పత్రి బయట రిక్షాలో ఆయన డెడ్బాడీని చూడగానే అమ్మ కళ్లు తిరిగి పడిపోయింది. నాన్న చనిపోయారన్న విషయం తెలియగానే సినీ ప్రముఖులు, మీడియా ప్రతినిధులు మా ఇంటికి వచ్చి తోచినంత సాయం చేశారు. నాన్న చనిపోయాకు మా కుటుంబమంతా చాలా కష్టాలు పడింది. మా మేనత్త మమ్మల్ని ఆదుకుని చదివించింది. మా ఆర్థిక పరిస్థితి తెలుసుకుని నటుడు కాదంబరి కిరణ్ మాకు సాయం చేశారు. ఆయన చేసిన సాయం వల్లే నేను సీఏ చదవగలిగాను. ఆయనకు ఎప్పటికీ రుణపడి ఉంటాను’ అని చెప్పుకొచ్చారు.
from Telugu Cinema News | తెలుగు సినిమా న్యూస్ | Latest Telugu Cinema News in Telugu https://ift.tt/34sd7SA
No comments:
Post a Comment