షకీలా తెలుగు ట్రైలర్: సిల్క్ స్మిత తర్వాత ఆమెనే.. తెరవెనుక శృంగార తార కష్టాలు

90 దశకంలో థియేటర్లలో గోల పెట్టించిన నటి షకీలా. కొన్ని సందర్భాల్లో థియేటర్లు హౌజ్‌ఫుల్‌ కావాలంటే డిస్ట్రిబ్యూటర్లకు ఉన్న ఒకే ఒక ఆప్షన్ షకీలా అని భావించిన రోజులవి. అంతేకాదు ఒక్కోసారి రిలీజ్ ఉందని స్టార్ హీరోల సినిమాలను సైతం వాయిదా వేసుకునేవారట. అప్పట్లో ఆమె సినిమాలు బాక్సాఫీస్‌ వద్ద కాసుల వర్షం కురిపించాయి. అంతలా ఊపు ఊపేసిన ఈ శృంగార తార జీవితంలో ఎన్నో మలుపులున్నాయి. కొందరు ఆమె సక్సెస్‌ను చూడలేక తొక్కేశారని కామెంట్స్‌ కూడా వినిపించాయి. స్వయంగా షకీలా కుటుంబ సభ్యులే ఆమెను మోసం చేశారు. వీటన్నింటి ఆధారంగా తీసుకొని ఆమె జీవితాన్ని వెండితెరపై చూపించబోతున్నారు డైరెక్టర్ ఇంద్రజీత్‌ లంఖేష్‌. ఈ బయోపిక్‌ని ‘షకీలా’ అనే పేరుతోనే ప్రేక్షకుల ముందుకు తీసుకొస్తున్నారు. తెలుగు,తమిళం,హిందీ భాషల్లో ఈ మూవీ విడుదల కానుంది. ఇప్పటికే షూటింగ్ ఫినిష్ చేసి చిత్ర ప్రమోషన్స్‌లో భాగంగా తాజాగా 'షకీలా' తెలుగు ట్రైలర్ రిలీజ్ చేశారు. 2 నిమిషాల 20 సెకనుల నిడివితో కూడిన ఈ ట్రైలర్‌లో షకీలా జీవితంలో జరిగిన కొన్ని సంఘటనలను చూపించి సినిమాపై ఆసక్తి పెంచేశారు. ఇందులో సిల్క్ స్మిత క్యారెక్టర్ కూడా చూపించడంతో అసలేం జరిగింది? తెర వెనుక షకీలా పడిన కష్టాలేంటి? చూడాలనే కుతూహలం ప్రేక్షకుల్లో పెరిగింది. నూతన సంవత్సరం కానుకగా ఈ చిత్రాన్ని 2021 జనవరి 1వ తేదీన విడుదల చేయనున్నారు. బాలీవుడ్‌ నటి రిచా చద్దా ఈ షకీలా మూవీలో టైటిల్‌ రోల్‌లో కనిపించనున్నారు. ఇటీవల వచ్చిన ‘మీర్జాపూర్‌’ సిరీస్‌తో అలరించిన నటుడు పంకజ్‌ త్రిపాఠి, మలయాళ నటుడు రాజీవ్‌ పిళ్లై ముఖ్య పాత్రలు పోషించారు. ఇకపోతే ఈ సినిమాలో మహిళల కోసం ప్రత్యేకంగా ఓ సందేశం ఉందని, తనలా ఎవరూ మోసపోకూడదనే ఉద్దేశ్యంతో ఇలా తన బయోపిక్‌తో మంచి సందేశాన్ని ఇవ్వనుండటం సంతోషంగా ఉందని ఇటీవలే షకీలా పేర్కొన్నారు.

from Telugu Cinema News | తెలుగు సినిమా న్యూస్ | Latest Telugu Cinema News in Telugu https://ift.tt/2WLM4h5