అభిమానులతో రాక్స్టార్గా పిలుపించుకుంటున్న ప్రముఖ సంగీత దర్శకుడు దేవిశ్రీ ప్రసాద్ మంచి రచయిత కూడా. పాటలను స్వరపరచడమే కాకుండా ఆయన కూడా రాస్తుంటారు. ఇప్పటికే ఆయన చాలా పాటలు రాశారు. అంతేకాదు, తాను పాటలు రాయించుకునే రచయితలకు సలహాలు కూడా ఇస్తుంటారు. వాళ్లతో కొత్త కొత్త పద ప్రయోగాలు చేయిస్తుంటారు. ఇతర భాషా పదాలను కూడా వాడుతుంటారు. ఇప్పటికే ఇతర భాషలకు చెందిన పదాలను తన పాటల్లో ప్రయోగించారు డీఎస్పీ. మహేష్ బాబు హీరోగా సుకుమార్ దర్శకత్వంలో వచ్చిన ‘1 నేనొక్కడినే’ సినిమాలో ‘ఆవ్ తుజో మో కోర్తా’ పాట డీఎస్పీ పద ప్రయోగానికి ఒక మంచి ఉదాహరణ. ‘ఐ లవ్ యు’ని కోంకణి భాషలో ‘ఆవ్ తుజో మో కోర్తా’ అంటారట. దీన్ని తన పాటలో ఎంతో అందంగా వాడుకున్నారు దేవి. ఇప్పుడు ఒక స్పానిష్ పదాన్ని తన పాటలో వాడారు ఈ యువ సంగీత సంచలనం. ఆ పదం ‘ఓలా చికా’. అంటే తెలుగులో ‘హలో పిల్లా’ అని అర్థమట. బెల్లంకొండ సాయి శ్రీనివాస్ హీరోగా సంతోష్ శ్రీనివాస్ దర్శకత్వంలో రూపొందుతోన్న చిత్రం ‘అల్లు అదుర్స్’. నభా నటేష్, అను ఇమ్మాన్యుయేల్ హీరోయిన్లు. సోనూ సూద్, ప్రకాష్ రాజ్ కీలక పాత్రలు పోషించారు. సుమంత్ మూవీ ప్రొడక్షన్స్ బ్యానర్పై సుబ్రహ్మణ్యం గొర్రెల ఈ చిత్రాన్ని నిర్మిస్తున్నారు. పర్ఫెక్ట్ ఫ్యామిలీ ఎంటర్టైనర్గా రూపొందుతోన్న ఈ చిత్రం సంక్రాంతి కానుకగా జనవరి 15న థియేటర్లలో విడుదల కానుంది. ఈ సినిమా నుంచి ఆదివారం ఒక పాటను విడుదల చేశారు. ‘ఓలా చికా’ అంటూ సాగే ఈ పాట చాలా హుషారుగా ఉంది. ‘హలో పిల్లా’ అనే పదాన్ని ఇప్పటికే చాలా సార్లు వాడేయడంతో దానికి బదులు ‘ఓలా చికా’ అనే స్పానిస్ పదాన్ని వాడరట. ఈ వివరణను కూడా పాటలో భాగంగా ఇచ్చేశారు దేవిశ్రీ ప్రసాద్. శ్రీమణి సాహిత్యం అందించిన ఈ పాటను జస్ప్రీత్ జాజ్ ఆలపించారు. ఈ హుషారైన పాటకు అంతే హుషారుగా స్టెప్పులేశారు హీరో శ్రీనివాస్. కవ్ బాయ్ లుక్లో అదరగొట్టారు.
from Telugu Cinema News | తెలుగు సినిమా న్యూస్ | Latest Telugu Cinema News in Telugu https://ift.tt/2KVCtBT
No comments:
Post a Comment