వైవిధ్యమైన చిత్రాలతో టాలీవుడ్లో తనకంటూ ప్రత్యేకమైన గుర్తింపు సంపాదించుకున్న దర్శకుడు ఇంద్రగంటి మోహనకృష్ణ. ఆహ్లాదకరమైన హాస్యం, మనసుకు హత్తుకునే భావోద్వేగాలు ఇంద్రగంటి సినిమాలో కనిపిస్తాయి. తక్కువ బడ్జెట్లో మంచి సినిమాలు నిర్మించడంలో మోహనకృష్ణ దిట్ట. ‘అష్టా-చమ్మా’, ‘గోల్కొండ హైస్కూల్’, ‘జెంటిల్మేన్’, ‘అమీ తుమీ’ సినిమాలే దీనికి ఉదాహరణలు. అయితే, రెండేళ్ల క్రితం అంటే 2018లో సుధీర్ బాబు, అదితీరావు హైదరి హీరోహీరోయిన్లుగా ఇంద్రగంటి మోహనకృష్ణ దర్శకత్వంలో వచ్చిన ‘సమ్మోహనం’ సినిమా ప్రేక్షకుల మన్ననలతో పాటు విమర్శకుల ప్రశంసలు అందుకుంది. ఈ సినిమా తరవాత ‘V’ చిత్రంలో సుధీర్ బాబుకు అవకాశం ఇచ్చారు. నేచురల్ స్టార్ నాని, హీరోలుగా నటించిన ఈ మల్టీస్టారర్ ఊహించిన స్థాయిలో ప్రేక్షకులను ఆకట్టుకోలేకపోయింది. అయితే, ఇప్పుడు ముచ్చటగా మూడోసారి ఇంద్రగంటి మోహనకృష్ణ దర్శకత్వంలో నటించేందుకు సిద్ధమవుతున్నారు సుధీర్ బాబు. ఇది సుధీర్ బాబుకు 14వ సినిమా. కృతిశెట్టి హీరోయిన్. రొమాంటిక్ ఎంటర్టైనర్గా రూపొందనున్న ఈ సినిమా రేపు ప్రారంభంకానుంది. గాజులపల్లె సుధీర్ బాబు సమర్పణలో బెంచ్మార్క్ స్టూడియోస్ బ్యానర్పై బి.మహేంద్రబాబు, కిరణ్ బల్లపల్లి ఈ చిత్రాన్ని నిర్మిస్తున్నారు. బెంచ్మార్క్ స్టూడియోస్ నిర్మిస్తోన్న తొలి చిత్రమిది. వివేక్ సాగర్ సంగీతం సమకూరుస్తున్న ఈ చిత్రానికి సిరివెన్నెల సీతారామశాస్త్రి, రామజోగయ్య శాస్త్రి సాహిత్యం అందిస్తున్నారు. పి.జి.విందా సినిమాటోగ్రఫీ అందిస్తున్నారు. మార్తాండ్ కె. వెంకటేష్ ఎడిటర్. ఈ చిత్రానికి సంబంధించి మరిన్ని విశేషాలు రేపు తెలియనున్నాయి.
from Telugu Cinema News | తెలుగు సినిమా న్యూస్ | Latest Telugu Cinema News in Telugu https://ift.tt/38Weiv5
No comments:
Post a Comment