దివంగత నటి మంజుల, సీనియర్ నటుడు విజయకుమార్ దంపతుల పెద్ద కుమార్తె ‘దేవి’ సినిమాతో తెలుగు ప్రేక్షకులకు పరిచయమయ్యారు. ఆ తరవాత మళ్లీ మరో తెలుగు సినిమాలో వనిత నటించలేదు. కానీ, ఈ మధ్య కాలంలో తెలుగు రాష్ట్రాల్లోనూ ఆమె పేరు మారుమోగింది. దీనికి కారణం ఆమె మూడో పెళ్లి. లాక్డౌన్ సమయంలో పీటర్ అనే ఫిలిం మేకర్ను ఆమె మూడో పెళ్లి చేసుకోవడం.. దీనిపై పీటర్ భార్య గొడవ చేయడం.. పీటర్తో వనితకు కొన్ని రోజుల్లోనే విభేదాలు తలెత్తడం.. వాళ్లు విడిపోవడం జరిగిపోయాయి. తమిళ బిగ్ బాస్ షో పాల్గొనడం ద్వారా తన పాపులారిటీని బాగా పెంచుకున్న వనిత.. మూడో పెళ్లి చేసుకుని వెంటనే విడిపోయి నవ్వుల పాలు అయ్యారు. అయితే, తాను వరుస పెళ్లిళ్లు చేసుకోవడం.. వెంటనే మళ్లీ విడిపోవడం ఎందుకు జరుగుతోందో వనిత వివరించారు. తన పెళ్లిళ్లపై ఆమె ఓపెన్గా మాట్లాడారు. తాజాగా ఆమె ఇచ్చిన ఓ ఇంటర్వ్యూలో తన పెళ్లిళ్లపై, తల్లిదండ్రులపై సంచలన వ్యాఖ్యలు చేశారు. తన వైవాహిక జీవితం సరిగా సాగకపోవడానికి తల్లిదండ్రులదే బాధ్యత అని ఆరోపించారు వనిత. అంతేకాదు, తన ఇష్యూలోకి చిరంజీవి, రజినీకాంత్ను కూడా తీసుకొచ్చారు. సౌత్ ఇండస్ట్రీలో రజినీకాంత్, చిరంజీవి లాంటి ప్రముఖ నటులు తమ కూతుళ్ల సంతోషాన్ని దృష్టిలో పెట్టుకుని మంచి వాళ్లను చూసి మళ్లీ పెళ్లి చేశారని.. కానీ, తన తల్లిదండ్రులు తన విషయంలో అలా చేయలేదని వనిత ఆరోపించారు. 18 ఏళ్లకే తనకు పెళ్లి చేసి చేతులు దులిపేసుకున్నారని, తన ఇబ్బందులను వాళ్లు అర్థం చేసుకోలేదని వ్యాఖ్యానించారు. భర్తతో తనకు గొడవలు వచ్చి విడిపోయినా పరువు కోసం తన తల్లిదండ్రులు మళ్లీ అతడి వద్దకే తనను పంపించేవారని ఆరోపించారు. ఇలా చాలా సార్లు జరిగిందన్నారు. రజినీకాంత్, చిరంజీవి తమ కూతుళ్లను అర్థం చేసుకన్నట్టు తనను కూడా తన తల్లిదండ్రులు అర్థం చేసుకుని ఉంటే తన జీవితం మరోలా ఉండేదని వనిత వాపోయారు. అయితే, మూడో పెళ్లి విషయంతో తాను తప్పటడుగు వేశానని వనిత అంగీకరించారు. అసలు పీటర్తో తనకు జరిగింది పెళ్లే కాదని అన్నారు. ఇదిలా ఉంటే, ఆ మధ్య ఇచ్చిన మరో ఇంటర్వ్యూలో వనిత తన తండ్రి విజయకుమార్పై సంచలన వ్యాఖ్యలు చేసిన సంగతి తెలిసిందే. తన తండ్రిని విలన్తో పోల్చారామె. అంతేకాదు, తన తల్లి మంజులను కూడా ఆర్థికంగా మోసం చేశారని ఆరోపించారు.
from Telugu Cinema News | తెలుగు సినిమా న్యూస్ | Latest Telugu Cinema News in Telugu https://ift.tt/3olao5g
No comments:
Post a Comment