కేసీఆర్ సాక్షిగా చిరంజీవి చెప్పిన చీరాల వీరయ్య కథ

ప్రతి మనిషి జీవితంలోనూ తనలో స్ఫూర్తి నింపిన ఒక వ్యక్తి ఉంటాడని.. తన జీవితంలోనూ ఒక మనిషి ఉన్నాడని మెగాస్టార్ చిరంజీవి అన్నారు. డిగ్రీ చదువుకున్న తరవాత ఏం చేయాలో తెలియని పరిస్థితిలో తనలో ఎంతో స్ఫూర్తిని నింపి తాను గొప్ప నటుడిగా ఎదగడానికి ఒక వ్యక్తి కారణమయ్యాడని, ఆయన్ని ఎప్పటికీ మరిచిపోనని వెల్లడించారు. ఆ వ్యక్తి పేరు వీరయ్య అని, ఆయనది చీరాల అని, తన తండ్రి వద్ద కానిస్టేబుల్‌గా పనిచేసేవారని చిరంజీవి చెప్పుకొచ్చారు. ఈ మేరకు ‘టీవీ9 నవ నక్షత్ర సన్మానం 2019’ కార్యక్రమంలో పాల్గొన్న చిరంజీవి.. ముఖ్యమంత్రి కేసీఆర్ సమక్షంలో ఈ ఆసక్తికర విషయాలు వెల్లడించారు. ‘‘జీవితంలో ఎలా ఎదగాలి అనడానికి నాకు నేనే ఉదాహరణగా చెప్పుకోగలను. వెనకా ముందు ఎవ్వరూ లేరు. నాన్న ఒక కానిస్టేబుల్ నుంచి ఎస్ఐ అయ్యారు. ఆయన ఎస్ఐ అయిన సమయంలో మేం చీరాలలో ఉండేవాళ్లం. అప్పుడు నా డిగ్రీ అయిపోయింది. తరవాత ఏం చేయాలో అగమ్యగోచర పరిస్థితి. సినిమా పట్ల మక్కువ ఉండేది. కానీ, సినిమా పరిశ్రమలో నాకు తెలిసినవారు ఎవ్వరూ లేరు. అక్కడికి వెళ్తే నేను ఏకాకిని అయిపోతాను. దారీతెన్నూ లేని పరిస్థితి అయిపోతుంది. ఎలా.. ఏం చేయాలి అని ఆలోచిస్తున్నప్పుడు నా గురువులు ఎవ్వరూ నాకు ఏం చెప్పలేదు. కానీ, నాన్నగారి దగ్గర పనిచేసే ఒక కానిస్టేబుల్.. నీకు సినిమాలంటే పిచ్చి కదా వెళ్లొచ్చు కదా అన్నాడు. అమ్మో.. అక్కడికి వెళ్తే ఏమీ తెలీదు, ఎవరిని అడగాలి వేషాల కోసం అని అన్నాను. ఏంటి బాస్ నువ్వు అలా అంటావ్.. నువ్వు శత్రుఘ్న సిన్హాలా ఉంటావ్.. నువ్వు డైలాగ్ చెబితే అదిరిపోతుంది.. నువ్వు ఫొటోలు తీసి పంపించు అన్నాడు. శత్రుఘ్న సిన్హా అనగానే నాకు తెలియకుండానే నా బాడీ లాంగ్వేజ్ మారిపోయింది. వెంటనే వాడి ముందే డైలాగులు చెప్పేశాను. ‘హాత్ మే బందూక్ లేకర్ కిదర్ బి షేర్ బంజాయగే హీరా’ అన్నాను. వాడు క్లాప్స్ కొట్టేశాడు. నా మొట్టమొదటి ఆడియన్ వాడు. వాడు కొట్టిన క్లాప్స్ వల్ల నాలో తెలియని ఉత్తేజం వచ్చింది. ఇది చాలు నువ్వు పెద్ద యాక్టర్ అయిపోవడానికి అన్నాడు. రా స్టూడియోకి వెళ్లి ఫొటోలు తీసుకొని ఫిల్మ్ ఇన్‌స్టిట్యూట్‌కి పంపిద్దాం అన్నాడు. ఎందుకంటే శత్రుఘ్న సిన్హా కూడా పూణె ఫిల్మ్ ఇన్‌స్టిట్యూట్ చేరి ఆ తర్వాత పెద్ద యాక్టర్ అయిపోయారు.. నువ్వు అలా వెళ్లిపో అన్నాడు. అది పిచ్చితనతో, గుడ్డి నమ్మకమో.. లేదంటే నా మీద నాకు నమ్మకమో తెలీదు కానీ.. యాక్టర్ అవుతాననే బలీయమైన పట్టుదలతో ప్రయత్నం చేశాను. నా ప్రయత్నం వృథా కాలేదు. ఎవరైతే నన్ను ఇన్‌స్పైర్ చేశాడో, నన్ను ఉత్సాహపరిచాడో, ప్రోత్సహించాడో ఈరోజుకీ ఆ వ్యక్తిని నేను మరిచిపోలేదు. ఆ వ్యక్తి పేరు వీరయ్య.. కానిస్టేబుల్.. చీరాలలో ఉంటాడు. కాబట్టి, ప్రతి వాళ్లకు వాళ్ల లైఫ్‌లో ట్రిగ్గరింగ్ పాయింట్ ఉంటుంది. వాళ్లను ఉత్సాహపరిస్తే, ప్రోత్సహిస్తే వాళ్లు సాధించలేనిదంటూ ఏదీ లేదు’’ అని చిరంజీవి చెప్పుకొచ్చారు.

from Telugu Cinema News | తెలుగు సినిమా న్యూస్ | Latest Telugu Cinema News in Telugu https://ift.tt/2t9xRPk