బిగ్ బాస్ తమిళ్ సీజన్ 2 కంటెస్టెంట్, నటి లోస్లియా తండ్రి ఎస్. మరియనేసన్ హఠాన్మరణం చెందారు. గుండె నొప్పితో ఆదివారం మరియనేసన్ కన్నుమూశారు. ఆయన కెనడాలో మృతిచెందారు. శ్రీలంకలో న్యూస్ ప్రెజంటర్గా పనిచేసిన లోస్లియా చెన్నై వచ్చి నటిగా మారారు. బిగ్ బాస్ తమిళ్ రెండో సీజన్లో పాల్గొనడం ద్వారా ఆమె పాపులారిటీ సంపాదించారు. బిగ్ బాస్ హౌస్లో ఉన్నప్పుడు ఓ టాస్క్లో తన తండ్రి గురించి లోస్లియా వెల్లడిస్తూ తీవ్ర భావోద్వేగానికి గురయ్యారు. తండ్రిపై తనకున్న ప్రేమను చాటుకున్నారు. తండ్రితో గడిపిన క్షణాలను గుర్తుచేసుకున్నారు. బిగ్ బాస్ షోలోని ఒక ఎపిసోడ్లో మరియనేసన్ కూడా కనిపించారు. ఆ సీజన్లో విపరీతంగా పాపులర్ అయిన లోస్లియా, కవిన్ రిలేషన్షిప్ గురించి కూడా మరియనేసన్ మాట్లాడారు. బిగ్ బాస్ షోలో లోస్లియా, కవిన్ మధ్య ఏర్పడిన బంధం వల్ల ఛానెల్ టీఆర్పీ రేటింగ్ కూడా అమాంతం పెరిగిపోయింది. మరియనేసన్ బిగ్ బాస్ షోలో అడుగుపెట్టిన తరవాత ఈ రిలేషన్షిప్ మరింత టామ్ టామ్ అయ్యింది. ఎందుకంటే, షోలోనే ఈ విషయంపై లోస్లియాను మరియనేసన్ మందలించారు. ఆ సమయంలో లోస్లియా తల్లి, చెల్లెళ్లు కూడా ఉన్నారు. అయితే, ఆ సీజన్ ముగిసిన తరవాత మళ్లీ ఎప్పుడూ లోస్లియా-కవిన్ జంట బయట కనిపించలేదు. దీంతో ఈ రొమాన్స్ను కావాలనే బిగ్ బాస్ వాళ్లు సృష్టించారని విమర్శలు వచ్చాయి. బిగ్ బాస్ స్క్రిప్టెడ్ అని కూడా చాలా మంది విమర్శించారు. ఇదిలా ఉంటే, బిగ్ బాస్ సీజన్ 2లో లోస్లియా టాప్-3 కంటెస్టెంట్లలో ఒకరిగా నిలిచారు. మరియనేసన్ కన్నుమూయడంతో ఆయన మృతికి సంతాపం తెలియజేస్తూ లోస్లియా అభిమానులు ట్వీట్లు చేస్తున్నారు. మరోవైపు, లోస్లియా ప్రస్తుతం ‘ఫ్రెండ్షిప్’ అనే సినిమాలో నటిస్తున్నారు. క్రికెటర్ హర్భజన్ సింగ్ హీరోగా పరిచయమవుతోన్న ఈ సినిమాను తమిళంతో పాటు తెలుగు, హిందీ భాషల్లో విడుదల చేస్తున్నారు. జాన్ పాల్ రాజ్, శ్యామ్ సుందర్ ఈ సినిమాకి దర్శకత్వం వహిస్తున్నారు. ఈ సినిమాతో పాటు మరికొన్ని ప్రాజెక్టులు లోస్లియా చేతిలో ఉన్నట్టు సమాచారం. వీటిలో కొత్త దర్శకుడు జేఎం రాజా శరవణన్ చిత్రం, నటుడు ఆరితో ఒక సినిమా ఉన్నాయి.
from Telugu Cinema News | తెలుగు సినిమా న్యూస్ | Latest Telugu Cinema News in Telugu https://ift.tt/32L7f6k
No comments:
Post a Comment