సమాజంలో పేరున్న వ్యక్తి.. తనను పెళ్లి చేసుకుంటానని మాటిచ్చాడని, రేప్ చేశాడని ఓ మహిళ ఫిర్యాదు చేస్తే? చాలా మంది నిజమే అనుకుంటారు. చట్టాలు కూడా స్త్రీలకే అనుకూలంగా ఉంటున్నాయి. మరో రకంగా చెప్పాలంటే ఒకింత పక్షపాత ధోరణిలోనే ఉంటున్నాయి. కానీ మహిళలు చట్టాన్ని తమకు అనుకూలంగా ఉపయోగించుకొని తప్పుడు ఆరోపణలు చేస్తే..? ఉద్దేశపూర్వకంగా కేసుల్లో ఇరికించే ప్రయత్నం చేస్తే..? నిందితుడే అసలైన బాధితుడైతే..? ఆరోపణలు ఎదుర్కొంటున్న వ్యక్తి పరువు గంగలో కలిసినట్టే. తప్పుడు కేసులతోపాటు ఛీత్కారాలు అదనం. కిలాడీ లేడీలు అక్రమంగా బనాయించిన కేసుల కారణంగా ఊచలు లెక్కబెడుతున్న అమాయక మగానుభావులెందరో. తాజాగా టీవీ నటుడు, సింగర్ కరణ్ ఒబెరాయ్ విషయంలోనూ ఇలాగే జరిగింది. తనను పెళ్లి చేసుకుంటానని మాటిచ్చాడని, తర్వాత రేప్ చేసి, ఆ వీడియోలతో తనను బెదిరిస్తున్నాడని ఓ మహిళ కరణ్ ఒబెరాయ్పై ఫిర్యాదు చేసింది. ఈ కేసు దేశవ్యాప్తంగా సంచలనమైంది. రేప్ ఆరోపణలతో కరణ్పై కేసు నమోదు కాగా.. మే 5న పోలీసులు ఆయన్ను అరెస్ట్ చేశారు. కానీ ఆయన మాత్రం తాను తప్పు చేయలేదని మొదటి నుంచి మొత్తుకుంటున్నారు. తొలుత కోర్టు ఆయనకు బెయిల్ మంజూరు చేయడానికి కూడా నిరాకరించింది. మే 25న కరణ్ ఒబెరాయ్పై సదరు మహిళ రెండో ఎఫ్ఐఆర్ నమోదు చేసింది. ఈ సందర్భంగా ఆమె తప్పుడు సమాచారం ఇచ్చినట్టు తేలింది. రేప్ ఆరోపణలు తప్పని తేలడంతో.. బాంబే హైకోర్ట్ జూన్ 7న కరణ్కు బెయిల్ మంజూర్ చేసింది. అనంతరం ముంబై పోలీసులు ఆ కిలేడీని అరెస్ట్ చేశారు. తర్వాత ఆమెకు కూడా బెయిల్ మంజూరైంది. తప్పుడు ఆరోపణల కారణంగా అరెస్టయిన కరణ్ ఒబెరాయ్ మానసికంగా ఎంతో వేదన అనుభవించారు. రిష్టోన్ కా వ్యాపార్ (సంబంధాలతో వ్యాపారం) పేరిట తన బాధను, అనుభవించిన మానసిక వేదనను పాట రూపంలో తీసుకొచ్చారు. ఈ పాట రాయడంతోపాటు ఆయనే స్వయంగా ఆలపించారు. టైమ్స్ మ్యూజిక్ ఈ పాటను రిలీజ్ చేసింది. ఏ తప్పూ చేయకపోయినప్పటికీ.. తనలాగే తప్పుడు కేసులు ఎదుర్కొన్న సాటి మగాళ్లందరికీ ఆయన తన పాటను అంకితం చేశారు. అందరికీ న్యాయం ఒకేలా ఉండాలని, చట్టాలు పక్షపాత ధోరణితో ఉండొద్దని కరణ్ కోరుకుంటున్నారు. బాధ, వేదనకు ఆడామగా అనే తేడా ఉండదంటున్నారు. తప్పుడు కేసుల కారణంగా కరణ్ ఒబెరాయ్ అరెస్ట్ కావడంతో ‘మీ టూ’లాగే ‘మెన్ టూ’ ఉద్యమం తీసుకురావాల్సిన అవసరం ఉందనే వాదన తెరపైకి వచ్చింది.
from Telugu Cinema News | తెలుగు సినిమా న్యూస్ | Latest Telugu Cinema News in Telugu https://ift.tt/2FLunpN
No comments:
Post a Comment