Bigg Boss Telugu 3 Contestants: బిగ్ బాస్‌తో కెరియర్ ఖేల్ ఖతమ్! ఇదీ హిస్టరీ.. నాగ్‌కి సవాల్

బిగ్ బాస్ సీజన్ 3 ఈనెల 21 (ఆదివారం) ప్రారంభంకానుంది. దీనిపై అధికారిక ప్రకటన రావాల్సి ఉండగా.. వరల్డ్ కప్ హడావిడి అప్పటికి అయిపోతుండటంతో.. జూలై 21 డేట్ దాదాపు ఖాయమైనట్టే. ఇక దేశ వ్యాప్తంగా ఈ షోకి ఫుల్ క్రేజ్ ఉండటంతో పాటు సౌత్‌లోనూ మంచి ఫాలోయింగ్ ఉంది. తమిళ్‌లో ఇప్పటికే సీజన్ 3 ప్రారంభంకాగా.. తెలుగులో నాగార్జున హోస్ట్ చేస్తుండటంతో బిగ్ బాస్ 3పై విపరీతమైన అంచనాలు ఏర్పడ్డాయి. ఈ షోపై విమర్శల స్థాయి ఉండనే ఉండగా.. రేటింగ్స్ పరంగా టాప్‌లో ఉంటూనే ఉంది. అయితే ఈ బిగ్ బాస్ షో వల్ల జనానికి ఏమైనా ఉపయోగం ఉందా? అనే ప్రశ్నలు లేవనెత్తుతుండగా.. ప్రేక్షకులకు వినోదమైతే అందుతోంది. ఇక ప్రేక్షకులకు ఏం ఉపయోగం అన్న విషయాన్ని పక్కన పెట్టేస్తే.. ఈ బిగ్గెస్ట్ రియాలిటీ షోలో పాల్గొనే కంటెస్టెంట్స్‌కు ఈ షో వల్ల ఒరిగింది ఏదైనా ఉందా? వారికి ఉన్న ఇమేజ్‌ను ఈ షో ద్వారా రెట్టింపు చేసుకున్నారా? లేక డ్యామేజ్ చేసుకున్నారా? లాంటి విషయాల్లోకి వెళ్తే.. ఒక్క ఛాన్స్.. ఒకే ఒక్క ఛాన్స్.. ఆ ఛాన్స్ వచ్చిందంటే దెబ్బకి సెలబ్రిటీ అయిపోవచ్చు. ఇక సినిమాల్లో ఆఫర్స్ వాటంతట అవే వరదలా వచ్చి మనం వద్దన్నా తలుపు కొడుతూనే ఉంటాయ్. ఇదీ బిగ్ బాస్‌ సీజన్‌లో పార్టిసిపేట్ చేసే ముందు కంటెస్టెంట్స్‌లో మెదిలే ఆలోచన. నిజమే.. ఒక్కరోజు కాదు రెండు రోజులు కాదు ఏకంగా 100 రోజులు పాటు ప్రతిరోజు, ప్రతి ఇంటిలో 4 గంటలకు పైగా (రికార్డెడ్‌తో కలిపి) టీవీల్లో మనమే కనిపిస్తుంటే.. ప్రేక్షకుల హృదయాల్లో కొలువుతీరిపోవచ్చు అనే భావన కంటెస్టెంట్స్‌లో ఉండటం సమంజసమే. అయితే నిజంగానే బిగ్ బాస్ షో వల్ల ప్రేక్షకులకు ఏంటి ఉపయోగం అన్న ప్రశ్నను పక్కనపెట్టేద్దాం.. కనీసం కంటెస్టెంట్స్‌కైనా లాభదాయకంగా ఉందా? వాళ్లు ఇమేజ్‌కి బిగ్ బాస్ హెల్ప్ అవుతుందా? లేక పూర్తిగా డ్యామేజ్ చేస్తుందా? అన్న విషయాలు చర్చలోకి తీసుకుంటే బిగ్ బాస్ సీజన్ 3కి కంటెస్టెంట్స్ కొరత ఏర్పడటం ఖాయంగానే కనిపిస్తుంది. బిగ్ బాస్ గత రెండు సీజన్ల హిస్టరీకి వెళ్తే.. కాసేపు బిగ్ బాస్ సీజన్ 2 ని పక్కన పెట్టేసి ఎన్టీఆర్ హోస్ట్ చేసిన సీజన్ 1 గురించి మాట్లాడుకుందాం.. 2017 జూలై 16న ప్రారంభమైన బిగ్ బాస్ సీజన్ 1కి ఎన్టీఆర్ హోస్ట్‌గా వ్యవహరించడంతో బుల్లి తెరపై బిగ్ బాస్ సన్సేషనల్ హిట్ అయ్యింది. టాప్ రేటింగ్‌తో టీఆర్పీ రేటింగ్‌లో అగ్రభాగాన నిలిచింది. 70 రోజుల పాటు 16 మంది కంటెస్టెంట్స్‌తో బుల్లితెర ప్రేక్షకులకు పూర్తి వినోదాన్ని అందించింది. ఇంతవరకూ బాగానే ఉంది. మరి ఆ 16 మంది కంటెస్టెంట్స్ ఇప్పుడు ఎక్కడ ఉన్నారు? ఏం చేస్తున్నారు? బిగ్ బాస్ షో వల్ల వాళ్లకు ఒరిగింది ఏమిటి? నిజంగా వాళ్లు భావించినట్లుగా బిగ్ బాస్ తరువాత వరుస ఆఫర్లు క్యూ కట్టాయా? సెలబ్రిటీలుగా మారిపోయారా? అంటే అదేం లేదనేదే అసలు నిజం. బిగ్ బాస్ 1లో పాల్గొన్న పోటీదారులు: అర్చన, సమీర్, ముమైత్ ఖాన్, ప్రిన్స్, సింగర్ మధుప్రియ, బర్నింగ్ స్టార్ సంపూర్ణేష్ బాబు, జ్యోతి, సింగర్ కల్పన, మహేష్ కత్తి, కత్తి కార్తీక, శివ బాలాజీ, ఆదర్శ్, హరి తేజ, ధనరాజ్, దీక్ష(వైల్డ్ కార్డ్), నవదీప్ (వైల్డ్ కార్డ్). ఈ 16 మంది కంటెస్టెంట్స్ బిగ్ బాస్ సీజన్ 1లో పాల్గొన్నారు. వీరిలో ఫైనల్ కన్టెస్టెంట్స్‌గా ఆదర్శ్, శివబాలాజీ, హరితేజ, నవదీప్, అర్చనలు పోటీ పడగా.. శివబాలాజీ బిగ్ బాస్ సీజన్ 1 విన్నర్‌గా నిలిచి రూ. 50 లక్షల ఫ్రైజ్ మనీ గెలుచుకున్నారు. మరి మిగిలిన వాళ్ల పరిస్థితి ఏంటి? అర్చన, సమీర్, ముమైత్ ఖాన్, ప్రిన్స్, సింగర్ మధుప్రియ, సంపూర్ణేష్ బాబు, కత్తి కార్తీక, ఆదర్శ్, ధనరాజ్, దీక్ష, నవదీప్‌లకు ఈ షో ముగిసిన తరువాత కొత్తగా వచ్చిన ఇమేజ్ ఏమైనా ఉందా అంటే లేదనే చెప్పాలి. అంతెందుకు ఫైనల్ విన్నర్‌గా నిలిచిన శివ బాలాజీ కూడా సినిమాల్లో కనిపించి చాలా కాలమైంది. సొంతంగా సినిమా తీసుకుని ఉన్న డబ్బుని కూడా పోగొట్టుకున్నారు శివ బాలాజీ. ఇక ఈ షో వల్ల కాస్తో కూస్తో లాభ పడింది ఎవరైనా ఉన్నారు అంటే అది హరితేజ అనే చెప్పాలి. మిగతా కంటెస్టెంట్స్‌తో పోల్చుకుంటే హరితేజ తరచూ సినిమాల్లో నటిస్తోంది. వివిధ సినీ ఫంక్షన్లలోనూ యాంకరింగ్‌తో మెప్పిస్తుంది. అయితే ఆమె మల్టీటాలెంటెండ్ కావడంతో ఆమెకు ఈ అవకాశాలు వస్తున్నాయి తప్ప.. బిగ్ బాస్ వల్లే అని అనలేం. యాంకర్ శ్యామలది ఇదే పరిస్థితి. బిగ్ బాస్ షోకి వెళ్లక ముందు ఆమె యాంకరింగ్ చేసుకునే వారు ఇప్పుడే అదే చేస్తున్నారు. ఇక కత్తి మహేష్.. బిగ్ బాస్ షో కంటే పవన్‌పై విమర్శల ద్వారానే ఎక్కవ పాపులర్ అయ్యారు. ఇక ఫైనల్ వరకూ వచ్చిన ఆదర్శ్ సైతం పెద్దగా నటించిన దాఖలాలు లేవు. ఈ మధ్య వచ్చిన ‘వైఫ్ ఆఫ్ రామ్’లో కనిపించారు. ఇక అర్చన అయితే అడ్రస్ లేదు. ఇటీవల ‘జెస్సీ’ చిత్రంలో కనిపించిందంతే. ఇక నవదీప్, సమీర్, కత్తి కార్తీక, ధనరాజ్, దీక్ష పరిస్థితి సరేసరి. బిగ్ బాస్ సీజన్ 2 విషయానికి వద్దాం.. ఈ సీజన్‌లో గీతా మాధురి, అమిత్ తివారీ, దీప్తి, తనీష్, బాబు గోగినేని, భాను శ్రీ, రోల్ రైడా, యాకర్ శ్యామల, కిరీటి, దీప్తి సునైనా, కౌశల్, తేజస్వి, గణేష్, సంజనా అన్నే, నూతన్ నాయుడు, నందినిలు కంటెస్టెంట్స్‌గా ఉన్నారు. ఈ కంటెస్టెంట్స్‌‌లో బిగ్ బాస్ వల్ల వచ్చిన ఇమేజ్ కంటే ఎక్కవగా డ్యామేజ్ జరిగిన కంటెస్టెంట్ ఎవరైనా ఉన్నారా అంటే ముందు వరసలో ఉంటుంది తేజస్వి. అప్పటి వరకూ చిన్నా చితకా సినిమాల్లో నటించిన తేజస్వికి ఫ్యాన్స్ బాగానే ఉన్నారు. అందం, ఆకట్టుకునే రూపంతో ఐక్రీం భామను ఇష్టపడ్డ ప్రేక్షకులు చాలా మందే. అయితే బిగ్ బాస్ ఎంట్రీ తరువాత ఈ అమ్మడు ఇమేజ్ ఒక్కసారిగా తలక్రిందులు అయ్యింది. కోలుకోలేని డ్యామేజ్ అయ్యింది. బిగ్ బాస్‌లో బలమైన కంటెస్టెంట్‌గా ఉన్న కౌశల్‌‌తో వివాదం, సామ్రాట్‌లో లవ్ ఎఫైర్, ఆమె వస్త్రధారణ తదితర బ్యాక్ డ్రాప్స్ కారణంగా ఆమెను బిగ్ బాస్ హౌస్‌నుండి వెళ్ల గొట్టారు ప్రేక్షకులు. ఇక భాను శ్రీ ది కూడా ఇదే పరిస్థితి. ఇక ఈ షో ద్వారా హీరోయిన్ అయిపోదామనుకున్న మోడల్ సంజనా అన్నే బిగ్ బాస్ హౌస్‌ నుండి తొలివారమే ఇంటి ముఖం పట్టడంతో ఆమె అన్ ఫిట్ అని తేల్చేశారు ప్రేక్షకులు. దీంతో ఆమె హీరోయిన్ ఆశలు గల్లంతయ్యాయనే చెప్పాలి. ఇక హౌస్‌లో ఉన్న దీప్తి సునైనా బిగ్ బాస్ హౌస్‌కి రాకముందు ఆమె యూట్యూబ్ సంచలనంగా ప్రేక్షకుల్లో మంచి గుర్తింపు ఉంది. కాని హౌస్‌కి వచ్చిన తరువాత ఆమె తనీష్‌తో ప్రేమ వ్యవహారం, అతడితో రొమాన్స్ కారణంగా ఆమెను సోషల్ మీడియాలో విపరీతంగా ట్రోల్ చేస్తున్నారు. దీంతో చాలా వరకూ ఆమె ఇమేజ్‌ కు డ్యామేజ్ అయ్యింది. మరో కంటెస్టెంట్ బాబు గోగినేని అయితే సోషల్ మీడియాలో ఫుట్ బాల్ ఆడేస్తున్నారు నెటిజన్లు. హౌస్‌కి రాకముందు ప్రముఖ హేతువాదిగా టీవీ కార్యక్రమాల్లో ప్రచారం పొందిన ఆయనకు బిగ్ బాస్ హౌస్ డ్యామేజింగ్ హౌస్‌లానే ఉంది. అన్నీ నాకే తెలుసు అన్న ధోరణి ప్రేక్షకులకు చిరాకు పెట్టిస్తుంది. అంతేకాకుండా కౌశల్, గీతా మాధురిలతో వివాదం కూడా ఆయన ఇమేజ్‌ను డ్యామేజ్ చేస్తుంది. ఇక తనీష్, సామ్రాట్, నందినిలపై కూడా నెగిటివ్ ట్రోల్ నడుస్తున్నాయి. ఇక బిగ్ బాస్ హౌస్‌లో సామాన్యుడిగా ఎంట్రీ ఇచ్చిన నూతన్ నాయుడు, గణేష్ లాంటి వాళ్లను బిగ్ బాస్ తరువాత జనం గుర్తించడమే మానేశారు. ఇక బిగ్ బాస్ 1, 2 విన్నర్స్‌గా నిలిచిన వాళ్లు శివబాలాజీ, కౌశల్‌లు సైతం మెరుగైన కెరియర్ కోసం అంటూ ప్రయత్నాలు కొనసాగిస్తూనే ఉన్నారు. ఇకపోతే.. నిన్నటి వరకూ టీవీల్లోనూ, సినిమాల్లోనూ ఫుల్ మేకప్‌తో కనిపించి వారెవ్వా.. అనిపించిన ముద్దుగుమ్మలు.. బిగ్ బాస్ హౌస్‌కి వచ్చేసరికి మేకప్ లేకుండా నిద్ర ముఖాలతో కనిపిస్తుంటే ప్రేక్షకులు వామ్మో.. వీళ్ల నిజరూపం ఇదా అంటూ షాక్‌కి గురౌతున్నారు. మేకప్ లేని ముఖాలు తట్టుకోవడం కష్టం సుమీ!! అన్న భావనకు వచ్చేశారు. అంతే కాకుండా హౌస్‌లో వాళ్లు ప్రవర్తించే తీరు, మాట్లాడే విధానం, గేమ్ ఆడే ధోరణితో వాళ్ల రియల్ లైఫ్ క్యారెక్టర్స్ బయట పడుతుండటంతో ఆడియన్స్ రిసీవింగ్‌లో చాలా తేడాలు వస్తున్నాయి. ఈ తరుణంలో బిగ్ బాస్ సీజన్ 3 కంటెస్టెంట్స్ ఎంపిక స్టార్ మా వారికి కత్తిమీద సాము కాగా.. ఈ షోలో 100 రోజుల పాటు ఉండటానికి సెలబ్రిటీలు పెద్దగా ఆసక్తి చూపించడం లేదు. దీంతో టాప్ సెలబ్రిటీలు, యాంకర్‌లు సుమ, ఉదయభాను, రష్మి, సుడిగాలి సుధీర్, లాస్య లాంటి వాళ్లు బిగ్ బాస్ మా వల్ల కాదని ఇప్పటికే చెప్పాశారు. దీంతో పెద్దగా పాపులారిటీ లేని దిగువశ్రేణి సెలబ్రిటీలతోనే సరిపెట్టేస్తున్నారు. వాస్తవానికి బిగ్ బాస్ సీజన్ 1తో పోల్చుకుంటే సీజన్ 2లో చాలా మంది పాపులరిటీ లేని వాళ్లే కంటెస్టెంట్స్‌గా ఉన్నారు. ఆ ప్రభావం రేటింగ్స్‌పై పడింది. సో ఇప్పుడు నాగార్జున హోస్ట్ చేస్తున్న సీజన్ 3 ఆయనతో పాటు యాజమాన్యానికి పెద్ద సవాల్ అనే చెప్పాలి. ఓవరాల్‌గా బిగ్ బాస్ వల్ల కంటెస్టెంట్స్‌కి ఒరిగింది ఏదైనా ఉందా అంటే సోషల్ మీడియాలో నెగిటివ్ ట్రోలింగ్స్, వ్యక్తిగత దూషణలు తప్ప కెరియర్ పరంగా బిగ్ బాస్ హెల్ప్ కావడం లేదనే చెప్పాలి. పైగా ఈ షోలో టాప్ సెలబ్రిటీలు మినహా.. ఓ మోస్తరు కంటెస్టెంట్స్‌కి రెమ్యునరేషన్‌ కూడా పెద్దగా ఉండదని.. గత సీజన్‌లో నూతన్ నాయుడు ఒక్క పైసా కూడా రెమ్యునరేషన్ తీసుకోలేదని బాంబ్ పేల్చారు. ఈ లెక్కన బిగ్ బాస్‌లో రెమ్యూనరేషన్ నిల్ తప్ప ఫుల్‌ ఉండదు. సో బిగ్ బాస్ అంటే కెరియర్ ఖేల్ ఖతమ్ అనే భావనను సీజన్ 3తో నాగార్జున చెరిపేస్తారేమో చూడాలి మరి.

from Telugu Cinema News | తెలుగు సినిమా న్యూస్ | Latest Telugu Cinema News in Telugu https://ift.tt/32drbwL