‘బిగ్ బాస్’ సీజన్ 3 సందడి మొదలైపోయింది. నిన్న మొన్నటి వరకు హోస్ట్ గురించి రకరకాల వార్తలొచ్చాయి. మొత్తానికి హోస్ట్ ఎవరో కన్ఫార్మ్ అయిపోయింది. కింగ్ నాగార్జున ఈసారి ‘బిగ్ బాస్’ హౌజ్‌లోని కంటెస్టెంట్లను తన కనుసైగలతో కట్టడి చేయబోతున్నారు. ఇదిలా ఉంటే, బిగ్ బాస్ హౌజ్‌లోకి ప్రవేశించే కంటెస్టెంట్ల గురించి ఇప్పటికే చాలా వార్తలు వచ్చాయి. హేమచంద్ర, ఉప్పల్ బాలు, ఉదయభాను, శ్రీముఖి, ‘తీన్మార్’ సావిత్రి ఇలా చాలా మంది పేర్లు వినిపించాయి. ఇప్పుడు మరొకరి పేరు కూడా గట్టిగా వినిపిస్తోంది. ఇప్పటి వరకు హౌజ్‌లోకి ఒకరితో ఒకరికి పరిచయంలేని, ఎక్కువగా తెలియని సెలబ్రిటీలు, సామాన్యులను మాత్రమే పంపిన బిగ్ బాస్ నిర్వాహకులు ఈ సీజన్‌లో దంపతులను కూడా పంపుతున్నారట. ఈ మేరకు దంపతులను ఎంపిక చేశారని అంటున్నారు. వరుణ్ సందేశ్ ఆయన భార్య వితికా షెరు జంటగా ‘బిగ్ బాస్ 3’లో పాల్గొనబోతున్నారని సమాచారం. ఇదే నిజమైతే ఈ మూడో సీజన్ మరింత రక్తి కట్టడం ఖాయం. సాధారణంగా ఒకరి గురించి ఒకరికి తెలియని వ్యక్తులు బిగ్ బాస్ హౌజ్‌లోకి అడుగుపెడతారు. లోపలికి వెళ్లాక ఒకరిపై ఒకరు చాడీలు చెప్పుకోవడాలు, అలగడాలు, గొడవలు పడటాలు ఉంటాయి. గత సీజన్‌లో ఇవి మరీ ఎక్కువగా చూశాం. అలాంటి వాతావరణంలోకి భార్యాభర్తలు ప్రవేశిస్తే ఎలా ఉంటుందో అనే ఆసక్తి కచ్చితంగా ప్రేక్షకులకు కలుగుతుంది. వరుణ్ సందేశ్ తెలుగు ప్రేక్షకులకు కొత్తేమీకాదు. ‘హ్యాపీడేస్’ సినిమాతో తెలుగు ప్రేక్షకులకు పరిచయమైన ఈ ఎన్నారై సుమారు 20 సినిమాల్లో చేశారు. వీటిలో హీరోగానే ఎక్కువ సినిమాలున్నాయి. ఈ సినిమాల ద్వారా తనకంటూ తెలుగు ప్రేక్షకుల్లో గుర్తింపు తెచ్చుకున్నారు కానీ, హీరోగా నిలదొక్కుకోలేకపోయారు. 2015లో వితిక షెరును వివాహం చేసుకున్న తరువాత సినిమాలకు బాగా దూరమైపోయారు. ఇటీవల వచ్చిన ‘నువ్వు తోపురా’ సినిమాలో మళ్లీ రీఎంట్రీ ఇచ్చారు. అయినప్పటికీ, సినిమా అవకాశాలు పెరిగే పరిస్థితి కనిపించడంలేదు. కాబట్టి ‘బిగ్ బాస్ 3’లోకి ప్రవేశిస్తే వరుణ్ సందేశ్‌కు కూడా మంచిదే. మళ్లీ మంచి పాపులారిటీ వస్తుంది. చూద్దాం ఈ రూమర్ నిజమవుతుందో లేదో!
from Telugu Cinema News | తెలుగు సినిమా న్యూస్ | Latest Telugu Cinema News in Telugu https://ift.tt/327g34g
No comments:
Post a Comment