సినిమా హీరోలకు బలం, బలహీనత రెండూ అభిమానులే. తమ హీరో పుట్టినరోజు వచ్చినప్పుడు లేదంటే తమ హీరో సినిమా వంద రోజులు పూర్తిచేసుకున్నప్పుడు అభిమానుల హంగామా మామూలుగా ఉండదు. ఇలాంటి కార్యక్రమాల ద్వారా తమ హీరోకున్న ఫ్యాన్ ఫాలోయింగ్ ఏమిటో చాటిచెబుతారు. ఇదే సమయంలో ఇతర హీరోలపై కొంత మంది ఫ్యాన్స్ దుష్ప్రచారం చేస్తుంటారు. తిట్టిపోస్తుంటారు. కానీ, ఫ్యాన్స్ అలా కాదట. అసలు ‘ఫ్యాన్స్’ అనే పదానికి అర్థాన్ని మార్చింది మెగా అభిమానులని మెగాస్టార్ చిరంజీవి స్వయంగా వెల్లడించారు. తన కోడలు, రామ్ చరణ్ భార్య, ప్రముఖ వ్యాపారవేత్త ఉపాసన కొణిదెలకి ఇంటర్వ్యూ ఇచ్చిన చిరంజీవి.. పలు ఆసక్తికర విషయాలను ఆమెతో పంచుకున్నారు. సినీ జీవితం, కుటుంబం, ఆరోగ్యం, సామాజిక సేవ వంటి అంశాలపై ఆయన మాట్లాడారు. చిరంజీవి బ్లడ్ బ్యాంక్ స్థాపించడం వెనుకున్న కారణాలేంటి, అసలు దానికి స్ఫూర్తి ఏంటని మెగాస్టార్ను ఉపాసన ప్రశ్నించారు. దీనికి చిరంజీవి సమాధానం ఇస్తూ.. ‘‘23 ఏళ్ల క్రితం నేను న్యూస్ పేపర్లో ఒక వార్త చదివాను. రక్తం కొరత కారణంగా రాష్ట్రంలో చాలా మంది చనిపోతున్నారని రాశారు. అత్యధిక జనాభా ఉన్న మన దేశంలో రక్తం కొరత కారణంగా ప్రజలు చనిపోవడం ఏంటని నాకు అనిపించింది. ఆ ఆలోచన నుంచే బ్లడ్ అండ్ ఐ బ్యాంక్ పుట్టింది’’ అని చిరంజీవి వెల్లడించారు. తనకు అశేష అభిమాన గణం ఉన్నప్పుడు రక్తం దానం వైపు వాళ్లను ఎందుకు నడిపించకూడదు, ఎందుకు వారిలో ప్రేరణ కలిగించకూడదు అని తనకు అనిపించిందని చిరంజీవి అన్నారు. ఆ వార్త చదివిన తరవాత దీనిపై తాను ప్రణాళికలు రచించడం మొదలుపెట్టానని చెప్పారు. తన ఆలోచన ఫ్యాన్స్ను రక్తదానం చేయడం, రక్తదాన శిబిరాలను ఏర్పాటుచేయడం వైపు నడిపించిందని చిరంజీవి వివరించారు. ఏడాది తరవాత తాను చిరంజీవి బ్లడ్ అండ్ ఐ బ్యాంక్ ఏర్పాటుచేశానని తెలిపారు. ఆ తరవాతే తెలంగాణ, ఆంధ్రప్రదేశ్లోని ప్రజల్లో ప్రేరణ వచ్చిందని.. రక్తదానం చేసేవాళ్ల సంఖ్య పెరిగిందన్నారు. ఇంత గొప్ప కార్యక్రమానికి నాంది పలికిన వ్యక్తిగా తాను నిలవడం చాలా సంతోషంగా ఉందని చిరంజీవి చెప్పారు. ఈ బ్లడ్ బ్యాంక్ కోసం ఆర్థికంగా ఎవ్వరి వద్ద చేయి చాచలేదని, ప్రతి పైసా తన జేబులో నుంచి తీసి పెట్టానని చిరంజీవి స్పష్టం చేశారు. రక్తదానంతో పాటు కంటిలోని కార్నియా శస్త్రచికిత్స కూడా లక్షలాది మందికి చిరంజీవి బ్లడ్ అండ్ ఐ బ్యాంక్ ద్వారా చేయించామని వెల్లడించారు. తన అభిమానుల వల్లే ఇదంతా చేయగలిగానని చిరంజీవి అన్నారు. ఒకవేళ తన అభిమానుల ప్రోత్సాహం లేకపోయుంటే ఇదంతా సాధ్యపడేది కాదని చెప్పారు. ‘‘ఈ గొప్ప చర్యతో ‘ఫ్యాన్స్’ అనే పదానికి నా అభిమానులు డెఫినేషన్ను మార్చారు. అభిమానులు తమ హీరోను పొగడటం, ఎదుటి హీరోని తిట్టడం మాత్రమే చేస్తారని.. అవతలి హీరో పోస్టర్లపై బురదజల్లడం లాంటి పనులు చేస్తారని ఒకప్పుడు అనుకునేవారు. కానీ, నా అభిమానుల ఇలాంటి సామాజిక సేవలో పాల్గొనడం వల్ల ‘ఫ్యాన్స్’ అనే పదానికి అర్థం, పరమార్థం మారిపోయాయి. విదేశాల్లో సైతం మెగా అభిమానులు నా పుట్టినరోజు, చరణ్ పుట్టినరోజులను సెలబ్రేట్ చేసుకుంటారు. సెలబ్రేషన్స్ అంటే హంగామా చేయడం కాదు.. రక్తదానం చేస్తున్నారు. వాళ్లంతా నా ఫ్యామిలీ. నా అంత:శక్తి వాల్లే’’ అని తన అభిమానుల గురించి చిరంజీవి చాలా గొప్పగా చెప్పారు.
from Telugu Cinema News | తెలుగు సినిమా న్యూస్ | Latest Telugu Cinema News in Telugu https://ift.tt/2THS3kk
No comments:
Post a Comment