రజినీకాంత్ సినీ జీవితానికి 44 ఏళ్లు.. దుమ్ములేపుతున్న రజినీయిజం

మనిషి చూడటానికి నల్లగా ఉంటారు. మరీ అంత ఎత్తు కూడా కాదు. బక్కపలచని శరీరం. నిజం చెప్పాలంటే హీరోకి ఉండాల్సిన భౌతిక లక్షణాల్లో ఆయనకున్నవి చాలా తక్కువే. కానీ, ఆయన అలా నడిస్తే చాలు వెండితెర షేక్ అయిపోతుంది. థియేటర్లు విజిల్స్‌తో మారుమోగిపోతాయి. రికార్డులు బద్దలైపోతాయి. ఈపాటికే అర్థమై ఉంటుంది ఆయనెవరో..!! ది వన్ అండ్ ఓన్లీ సూపర్ స్టార్ . పేరుకి ఆయన తమిళ హీరోనే అయినా ఆయనకు సౌతిండియా మొత్తం భారీగా ఫ్యాన్ ఫాలోయింగ్ ఉంది. కేవలం ఇక్కడే కాదు దేశ వ్యాప్తంగా.. ఇంకా చెప్పాలంటే జపాన్, హాంగ్ కాంగ్ వంటి దేశాల్లో కూడా తలైవాకు బోలెడంత మంది ఫ్యాన్స్. ప్రపంచ వ్యాప్తంగా కోట్లాది మంది అభిమానులను సంపాదించుకున్న సూపర్ స్టార్ భారతీయ సినిమాలోకి అడుగుపెట్టి 44 ఏళ్లు పూర్తయింది. ఈ సందర్భాన్ని ఆయన అభిమానులు పండుగలా జరుపుకుంటున్నారు. ట్విట్టర్ టాప్ ట్రెండింగుల్లో ఇది కూడా ఒకటిగా నిలిచింది. #44YrsOfUnmatchableRAJINISM హ్యాష్‌ట్యాగ్‌తో ట్విట్టర్‌లో టాప్-3 ట్రెండింగ్‌గా రజినీకాంత్ తన హవా చూపిస్తున్నారు. అభిమానులు తయారుచేసిన పోస్టర్లతో ట్విట్టర్ నిండిపోతోంది. కండక్టర్ నుంచి సూపర్ స్టార్.. రజినీకాంత్ అసలు పేరు శివాజీ రావ్ గైక్వాడ్. బెంగళూరులో స్థిరపడిన ఒక మరాఠా కుంటుంబంలో 1950 డిసెంబర్ 12న జన్మించారు. రామకృష్ణ మఠంలో విద్యను అభ్యసించే రోజుల్లోనే రజినీకాంత్ పౌరాణిక నాటకాల్లో నటించారు. అప్పట్లో రజినీ నటనకు మంచి ప్రశంసలు అందేవి. స్కూల్‌ ఎడ్యుకేషన్ పూర్తికాగానే రజినీ ఉద్యోగ వేటలో పడ్డారు. బెంగుళూర్ ట్రాన్స్‌పోర్ట్ సర్వీస్‌లో బస్ కండక్టర్‌గా చేరారు. అప్పట్లో కొత్తగా ఏర్పాటైన మద్రాస్ ఫిల్మ్ ఇన్‌స్టిట్యూట్ అడ్మిషన్స్ కోసం ప్రకటన ఇచ్చింది. ఇది చూసిన రజినీ స్నేహితుడు రాజ్ బహదూర్ ఆయన్ని ప్రోత్సహించారు. 1973లో రజినీకాంత్ మద్రాస్ ఫిల్మ్ ఇన్‌స్టిట్యూట్‌లో చేరారు. ఒకరోజు ఒక నాటక ప్రదర్శనలో రజినీకాంత్‌ను దిగ్గజ దర్శకుడు కె.బాలచందర్ చూశారు. వీలైనంత త్వరగా తమిళం నేర్చుకుంటే అవకాశం ఇస్తానని రజినీకి చెప్పారు. బాలచందర్ సూచన మేరకు రజినీ త్వరగానే తమిళం నేర్చుకున్నారు. 1975లో రజినీకి బాలచందర్‌ తొలి అవకాశం ఇచ్చారు. అలా రజినీ నటించిన తొలి చిత్రం ‘అపూర్వ రాగంగళ్’ అయ్యింది. ఇక అక్కడి నుంచి చిన్న చిన్న పాత్రలు చేసుకుంటూ సోలో హీరోగా ఎదిగారు. ఒక్క ఏడాదిలో 20కి పైగా సినిమాల్లో నటించారు. తనకు వచ్చిన ప్రతీ అవకాశాన్ని సద్వినియోగం చేసుకుంటూ రజనీ ఎదుగుతూ వచ్చారు. ‘16 వయతినిలె’ (తెలుగులో ‘16 ఏళ్ల వయసు’) చిత్రంలో కమల్ హాసన్, రజినీకాంత్ ఇద్దరూ నటించారు. ఇందులో రజినీ విలన్ పాత్ర పోషించారు. ఆ తరవాత సోలో హీరోగా మారిన రజినీ ‘భైరవి’ సినిమాతో సూపర్ హిట్ అందుకున్నారు. ఈ సినిమాతో రజినీ పేరుకు ముందు సూపర్ స్టార్ బిరుదు చేరింది. రజినీకాంత్ తమిళంలోనే కాకుండా తెలుగు, కన్నడ, హిందీ భాషల్లోనూ నటించారు. ‘టైగర్’ చిత్రంలో ఎన్టీఆర్‌కు తమ్ముడిగా చేశారు. అయితే, తమిళం నుంచి అనువాదమైన చిత్రాలతోనే తెలుగులో రజినీకాంత్ స్టార్ డమ్‌ను సంపాదించుకున్నారు. ‘దళపతి, బాషా, ముత్తు, అరుణాచలం, నరసింహ, చంద్రముఖి, శివాజీ, రోబో’ చిత్రాలు తెలుగు ప్రేక్షకులను విశేషంగా ఆకట్టుకున్నాయి. రజినీకాంత్ ఇప్పటి వరకు 165 చిత్రాల్లో నటించారు. ఆయన 166 చిత్రం ‘దర్బార్’ షూటింగ్ జరుపుకుంటోంది. ఎ.ఆర్.మురుగదాస్ దర్శకత్వంలో తెరకెక్కుతోన్న ఈ చిత్రం వచ్చే ఏడాది ప్రేక్షకుల ముందుకు వస్తుంది.

from Telugu Cinema News | తెలుగు సినిమా న్యూస్ | Latest Telugu Cinema News in Telugu https://ift.tt/2ZdDzhA