కేంద్రం గుడ్ న్యూస్.. తగ్గనున్న సినిమా టికెట్ల ధరలు!?

తెలుగు వారికి సినిమాలు చూడటమంటే భలే ఇష్టం. కొత్త సినిమా వచ్చిందంటే చాలు వారాంతంలో దాన్ని చూడాల్సిందే. ఎందుకో తెలియదు తెలుగు ప్రజలు సినిమాలను తెగ ఇష్టపడతారు. దీంతో హీరోలకు, నిర్మాతలు బాగానే సంపాదించుకుంటున్నారు. మనం సినిమాకు వెలితే టికెట్ కొని లోపలికి వెళ్లాలి. ఈ టికెట్‌పై మనం ప్రభుత్వానికి పన్ను చెల్లిస్తున్నాం. ఒకప్పుడు వ్యాట్, సర్వీస్ ట్యాక్స్ వంటివి ఉండేవి. కానీ తర్వాత వీటి స్థానంలో వస్తు సేవల పన్ను (జీఎస్‌టీ) వచ్చింది. ఇక్కడి నుంచే అసలు సమస్య మొదలైంది. ఎంటర్‌టైన్‌మెంట్ రంగం సినిమా టికెట్లపై ఒకే పన్ను విధించాలని కోరుకుంటోంది. ప్రస్తుతం రూ.100కు పైన ధర ఉన్న టికెట్లపై జీఎస్‌టీ శ్లాబ్ 18 శాతంగా ఉంది. అదే రూ.100 లోపు ధర ఉన్న మూవీ టికెట్లపై జీఎస్‌టీ శ్లాబ్ 12 శాతం. ఈ నేపథ్యంలోనే మూవీ టికెట్లపై ఒకే పన్ను విధించాలని సినీ పరిశ్రమ ప్రభుత్వాన్ని కోరుతూ వస్తోంది. బడ్జెట్‌లో దీనికి సంబంధించి ప్రకటన చేయాలని విజ్ఞప్తి చేస్తోంది. కేంద్ర ప్రభుత్వం జూలై 5న బడ్జెట్‌ను ప్రవేశపెట్టనున్న విషయం తెలిసిందే. కేంద్ర ఆర్థిక మంత్రి నిర్మలా సీతారామన్‌కు ఇది తొలి బడ్జెట్. ‘టికెట్ ధరలతో నిమిత్తం లేకుండా ప్రతి మూవీ టికెట్‌పై 12 శాతం జీఎస్‌టీ రేటును వర్తింపజేయాలి. సినిమా చూసేవారి సంఖ్య పెరుగుతుంది. దీంతో సినీ పరిశ్రమలో వృద్ధి బాటలో పయనిస్తుంది’ అని హార్క్‌నెస్ స్క్రీన్స్ సీనియర్ వైస్ ప్రెసిడెంట్ (ఆసియా) ప్రీతమ్ డేనియల్ తెలిపారు. కేంద్రం బడ్జెట్‌లో జీఎస్‌టీ తగ్గింపు ప్రకటన చేస్తే సినిమా టికెట్ ధరలు దిగివచ్చే అవకాశముంది. ‘దేశంలో ప్రస్తుతం 8,200 స్క్రీన్స్ ఉన్నాయి. ఇందులో 650 వాటిల్లో టికెట్ ధర రూ.50 లోపు ఉంది. 1,620 స్క్రీన్లలో టికెట్ ధర రూ.50 నుంచి రూ.100 మధ్యలో ఉంది. ఈ స్క్రీన్ల సంఖ్య మొత్తం స్క్రీన్లలో దాదాపు 27 శాతంగా ఉండొచ్చు. ఎక్కువ స్క్రీన్లలో టికెట్ ధర రూ.100కు పైనే ఉంది. అందుకే సంస్కరణలు తీసుకురావాలి’ అని ఆయన వివరించారు. అలాగే రూ.100లోపు టికెట్లపై జీఎస్‌టీ 5 శాతానికి తగ్గిస్తే ఇంకా మంచిదని అభిప్రాయపడ్డారు. కేంద్ర ప్రభుత్వం జీఎస్‌టీ తగ్గింపుతోపాటు మీడియా అండ్ ఎంటర్‌టైన్‌మెంట్ రంగంలో డిజిటల్ సంస్కరణలు కూడా తీసుకురావాలని పరిశ్రమ నిపుణులు పేర్కొంటున్నారు. ఈ పరిశ్రమలో ఉపాధి కల్పనకు అధిక అవకాశాలున్నాయని, అందువల్ల బడ్జెట్‌లో వృద్ధికి దోహదపడే నిర్ణయాలు తీసుకోవాలని కోరుతున్నారు.

from Telugu Cinema News | తెలుగు సినిమా న్యూస్ | Latest Telugu Cinema News in Telugu https://ift.tt/2JaZWLN