యూఎస్ బాక్సాఫీస్.. పడిపోయిన ‘సాహో’ కలెక్షన్స్!

రెబల్ స్టార్ హీరోగా నటించిన ఇండియాస్ బిగ్గెస్ట్ యాక్షన్ మూవీ ‘సాహో’ కలెక్షన్ల వర్షం కురిపిస్తోంది. ప్రపంచ వ్యాప్తంగా ఈ చిత్రం రెండు రోజుల్లో రూ.205 కోట్ల గ్రాస్ రాబట్టింది. ఇండియాలోనే రూ.160 కోట్లకు పైగా గ్రాస్ వసూలు చేసింది. దీనిలో డిస్ట్రిబ్యూటర్ల షేర్ రూ.99 కోట్ల వరకు ఉంది. ‘సాహో’పై నెగిటివ్ టాక్ వచ్చినా భారీ కలెక్షన్లు చూసి ప్రభాస్ ఫ్యాన్స్ ఫుల్ ఖుషీ అయ్యారు. అయితే, సౌత్ సినిమాలకు సాలిడ్ మార్కెట్‌గా చెప్పుకునే యూఎస్ బాక్సాఫీసు వద్ద మాత్రం ‘సాహో’ రాణించలేకపోతోంది. ‘సాహో’ యూఎస్‌లో ప్రీమియర్ షోలకు టిక్కెట్ ధరలు అమాంతం పెంచేయడంతో చాలా మంది ప్రేక్షకులు వెనకడుగు వేశారు. దీంతో ప్రీమియర్ షో కలెక్షన్లు ఆశించిన స్థాయిలో రాలేదు. గురువారం అమెరికా బాక్సాఫీస్ వద్ద ‘సాహో’ 820,000 డాలర్లు మాత్రమే రాబట్టింది. అంటే మన కరెన్సీలో దాదాపు రూ.5.8 కోట్లు. సూపర్‌స్టార్ మహేష్ బాబు కెరీర్‌లో అట్టర్ ఫ్లాప్‌గా నిలిచిన ‘స్పైడర్’ తొలిరోజు 1 మిలియన్ డాలర్లన్నా రాబట్టింది. కానీ ‘సాహో’ ఆ మాత్రం కూడా రాబట్టలేకపోయింది. దీనికి తోడు ప్రీమియర్ షోలకు నెగిటివ్ టాక్ రావడంతో శుక్రవారం కలెక్షన్లు భారీగా పడిపోయాయి. అమెరికా వ్యాప్తంగా మొత్తం 372 లొకేషన్స్‌లో విడుదలైన ‘సాహో’ శుక్రవారం 552,062 డాలర్లు మాత్రమే వసూలు చేసింది. వీకెండ్ శని, ఆదివారాల్లో కలెక్షన్లు కచ్చితంగా పెరుగుతాయని అంచనా వేశారు. కానీ, శనివారం కూడా కలెక్షన్స్ చాలా డల్‌గా ఉన్నాయి. శుక్రవారం కంటే 9 శాతం తగ్గిపోయి 498,541 డాలర్లు మాత్రమే వసూలయ్యాయి. మొత్తంగా చూసుకుంటే యూఎస్ వ్యాప్తంగా 1,966,048 డాలర్లు అంటే సుమారు రూ.14.05 కోట్ల గ్రాస్ వసూలైంది. మరి, ఫుల్ రన్‌లో ఈ చిత్రం ఎంత వసూలు చేస్తుందో చూడాలి!

from Telugu Cinema News | తెలుగు సినిమా న్యూస్ | Latest Telugu Cinema News in Telugu https://ift.tt/32hzwyz