నటుడు బ్రహ్మాజి ఏ ఈవెంట్కు వచ్చినా ఆయన్ని అంతా సరదాగా ఆటపట్టిస్తుంటారు. ముఖ్యంగా సుమ హోస్ట్ చేసే షో అయితే ఇక బ్రహ్మాజీపై పంచ్ల వర్షమే. అలా ఆడేసుకుంటారు ఆమె. తాజాగా ‘వాల్మీకి’ ప్రీ రిలీజ్ ఈవెంట్లోనూ ఇదే జరిగింది. ఈ సినిమాలో బ్రహ్మాజి యాక్టింగ్ టీచర్గా నటించారు. గ్యాంగ్స్టర్స్కి ఆయన నటన నేర్పుతారు. ఆయన పాత్ర చాలా కామెడీగా ఉండబోతుంది. దీన్ని దృష్టిలో పెట్టుకుని సుమ.. టీచర్ బ్రహ్మాజి గారు అంటూ వేదికపైకి ఆహ్వానించారు. ‘‘గుడ్ ఈవినింగ్ సార్’’ అంటూ బ్రహ్మాజీని సుమ పలకరించారు. వెంటనే బ్రహ్మాజి.. ‘‘గుడ్ ఈవినింగ్ అక్క’’ అన్నారు. దీనికి సుమ స్పందిస్తూ.. ‘‘ఏమిటి అక్క? మీరు ఎన్నేళ్ల నుంచి ఉన్నారో మాకు తెలుసు ఇండస్ట్రీలో. మొత్తానికి హరీష్ శంకర్ గారు వయసుకు తగిని మంచి క్యారెక్టర్ ఇచ్చారు మీకు. ఓకే మాస్టార్.. స్టూడెంట్స్ అంతా రెడీగా ఉన్నారు మీరు క్లాస్ తీసుకోండి’’ అని నవ్వుతూ అన్నారు. సుమతో నాకు గోల ఎందుకులే అనుకొని బ్రహ్మాజి స్పీచ్ మొదలుపెట్టారు. ఈ స్పీచ్ కూడా చాలా సరదాగా సాగింది. ‘‘వాల్మీకి సినిమాలో చిత్ర విచిత్రమైన క్యారెక్టర్ను మా హరీష్ శంకర్ నాకు ఇచ్చాడు. యాక్టింగ్ టీచర్ని. గ్యాంగ్స్టర్స్ అందరికీ యాక్టింగ్ నేర్పించాలి. కానీ, సెట్లో హరీష్ శంకర్ నాకు యాక్టింగ్ నేర్పిస్తే నేను వాళ్లకు నేర్పించేవాడిని. ఇలాంటి పాత్రను ఇప్పటి వరకు నేను చేయలేదు. బాడీ లాంగ్వేజ్ చాలా విరుద్ధంగా ఉంటుంది. ఇదొక ప్రత్యేకమైన పాత్ర’’ అని మాట్లాడుతూ బ్రహ్మాజి ఆలోచనలో పడ్డారు. వెంటనే అందుకున్న సుమ.. ‘‘’అయిపోయిందా అండి’ అని అడిగారు. దీంతో బ్రహ్మాజి చాలా సీరియస్గా.. ‘‘ఐయామ్ నాట్ డన్ ఎట్’’ అంటూ ‘‘భరత్ అనే నేను’’ సినిమాలో మహేష్ బాబు రేంజ్లో సుమపై అరిచారు. మొహంలో బాగా సీరియస్నెస్ చూపిస్తూ కామెడీ పండించారు. అందరినీ నవ్వించారు. ఇక సుమ ఊరుకుంటారా.. ‘‘టాబ్లెట్ వేసుకోలేనట్టుంది’’ అంటూ సెటైర్ వేశారు. దీంతో మరింత రెచ్చిపోయిన బ్రహ్మాజి మళ్లీ.. ‘‘ఐయామ్ నాట్ డన్ ఎట్’’ అంటూ అరిచారు. ‘‘ఓకే రిలాక్స్ రిలాక్స్’’ అంటూ సుమ కూల్ చేశారు. ఆ తరవాత బ్రహ్మాజి నవ్వుతూ.. ‘‘అక్క సారీ, మనసులో పెట్టుకోకు ఇవన్నీ’’ అంటూ సుమకు సోప్ వేసే ప్రయత్నం చేశారు. దానికి సుమ నవ్వుతూ.. ‘‘నేను మనసులో పెట్టుకోను. నోటిలో పెట్టుకుని చెప్తాను తరవాత’’ అని అన్నారు. కాసేపటికి బ్రహ్మాజి నోటి నుంచి వరుణ్ తేజ్ అనే మాట వచ్చింది. దీంతో అభిమానులు అరుపులు కేకలతో గోల గోల చేశారు. బ్రహ్మాజి సైలెంట్ అయిపోయారు. ఇప్పుడు మళ్లీ సుమకు టైమ్ వచ్చింది. ‘‘చెప్పారుగా ఐయామ్ నాట్ డన్ ఎట్.. ఐయామ్ నాట్ డన్ ఎట్ అని’’ అంటూ సెటైర్ వేశారు సుమ. అయితే ఈసారి మాత్రం ‘‘ఐయామ్ నాట్ డన్ ఎట్.. ప్లీజ్’’ అంటూ మెగా అభిమానులను బ్రహ్మాజి రిక్వెస్ట్ చేశారు. వరుణ్ తేజ్ గురించి మాట్లాడుతుంటే బ్రహ్మాజి వెనకాల స్క్రీన్పై వరుణ్, వెంకటేష్ క్లోజ్ అప్ షాట్ పడింది. దీంతో మరోసారి అరుపులు. మళ్లీ సుమకు టైమొచ్చింది. ‘‘మీ మాటలకు అరుస్తున్నారని అనుకుంటున్నారేమో..? వెనుక వరుణ్, వెంకటేష్ గారి క్లోజప్ పడింది’’ అంటూ అదోరకం మేనరిజంతో అందరినీ నవ్వించారు సుమ. మొత్తం మీద బ్రహ్మాజి మాట్లాడుతున్నంత సేపు అందరూ నవ్వుతూ ఎంజాయ్ చేశారు.
from Telugu Cinema News | తెలుగు సినిమా న్యూస్ | Latest Telugu Cinema News in Telugu https://ift.tt/2Nh8Ieq
No comments:
Post a Comment