తెలంగాణ ముఖ్యమంత్రి కేసీఆర్ చిత్ర పటానికి నటుడు, సామాజిక సేవకుడు పాలాభిషేకం చేశారు. కాళేశ్వరం ప్రాజెక్ట్ నిర్మాణాన్ని అత్యంత వేగంగా చేపట్టి, దాన్ని జాతికి అంకితం చేసినందుకు గాను తెలంగాణ ముఖ్యమంత్రి కేసీఆర్ను గౌరవిస్తూ ఆయన చిత్రపటానికి పాలాభిషేకం చేసే కార్యక్రమాన్ని హైదరాబాద్ ఫిలింనగర్లో నిర్వహించారు. ఈ కార్యక్రమంలో దర్శకుడు ఎన్ శంకర్, జూబ్లీహిల్స్ కార్పొరేటర్ కాజా సూర్యనారాయణ, చిత్రపురి కాలనీ సంఘ సభ్యులు వల్లభనేని అనిల్ కుమార్ తదితరులు పాల్గొన్నారు. వీరంతా కేసీఆర్ చిత్రపటానికి పాలాభిషేకం చేశారు. పాలాభిషేకం అనంతరం కాదంబరి కిరణ్ మాట్లాడుతూ.. ‘చరిత్రలో నిలిచిపోయే బృహత్కార్యాన్ని మన ముఖ్యమంత్రి కేసీఆర్ పూర్తి చేశారు. ఆయన కార్యసాధన దీక్ష, ప్రజలకు మేలు చేయాలనే నిరంతర తపనతోనే ఇవాళ కాళేశ్వరం ప్రాజెక్టు రికార్డు సమయంలో పూర్తయింది. తెలుగు నేలను సస్యశ్యామలం చేస్తున్న అపర భగీరథుడు కేసీఆర్. ఆయన వెంట కోట్లాది మందితో పాటు మేమూ నడుస్తాం. బంగారు తెలంగాణలో భాగస్వామ్యులం అవుతాం’ అని అన్నారు. దర్శకుడు ఎన్ శంకర్ మాట్లాడుతూ.. ‘కాళేశ్వరం ప్రాజెక్టును పూర్తి చేయడం ద్వారా తాను గొప్ప కార్యసాధకుడిని అని మన ముఖ్యమంత్రి కేసీఆర్ నిరూపించుకున్నారు. ఆయన కృషిని చూసి మొత్తం తెలంగాణ ప్రజానీకం గర్విస్తోంది. ‘మా’ స్టూడియో నిర్మాణానికి ఐదెకరాల స్థలం కేటాయించారు. చిత్ర పరిశ్రమ అభివృద్ధికి ఇది ఎంతగానో తోడ్పడాలని ఆశిస్తున్నా’ అని వెల్లడించారు. కాగా, కాళేశ్వరం ప్రాజెక్ట్ నిర్మాణం పట్ల యావత్తు తెలుగు సినీ పరిశ్రమ హర్షం వ్యక్తం చేస్తోంది. ఇప్పటికే కేసీఆర్, కేటీఆర్లను ఆకాశానికి ఎత్తుతూ హీరోలు మహేష్బాబు, రవితేజ, నాగార్జున ట్వీట్లు చేశారు. అలాగే, సినీ పరిశ్రమకు చెందిన ఇతర ప్రముఖులు సైతం సోషల్ మీడియా ద్వారా ప్రశంసల వర్షం కురిపించారు. ఇప్పుడు కాదంబరి ఒక అడుగు ముందుకు వేసి ఏకంగా పాలాభిషేకమే చేశారు. అయితే, ఈ ప్రాజెక్ట్ నిర్మాణం, ప్రారంభం విషయంలో కేసీఆర్, కేటీఆర్లను పొగుడుతున్న వారందరూ దీనికి మూలమైన హరీశ్రావును మరిచిపోతున్నారంటూ ఆయన అభిమానులు ఆగ్రహం వ్యక్తం చేస్తున్నారు.
from Telugu Cinema News | తెలుగు సినిమా న్యూస్ | Latest Telugu Cinema News in Telugu http://bit.ly/2KxvtsW
No comments:
Post a Comment