నటశేఖర, సూపర్ స్టార్ కృష్ణకు దక్కాల్సిన గౌరవం దక్కలేదని మెగాస్టార్ చిరంజీవి అభిప్రాయపడ్డారు. ఆయనకు దాదాసాహెబ్ ఫాల్కే అవార్డు ఇప్పటికే రావాల్సిందని ఆయన అన్నారు. మహేష్ బాబు ‘సరిలేరు నీకెవ్వరు’ ప్రీ రిలీజ్ ఈవెంట్‌కు ముఖ్య అతిథిగా విచ్చేసిన చిరంజీవి.. కృష్ణ పేరును దాదా సాహెబ్ ఫాల్కే అవార్డుకు నామినేట్ చేయాల్సిందిగా ఆంధ్రప్రదేశ్, తెలంగాణ రాష్ట్ర ప్రభుత్వాలను కోరారు. ఇది తన కోరిక మాత్రమే కాదని, డిమాండ్ అని గట్టిగానే చెప్పారు. ‘‘మన సౌత్ ఇండియాలోనే సీనియర్ మోస్ట్ యాక్టర్ కృష్ణ గారు. బహుశా అంతకన్నా పెద్దవాళ్లు ఉన్నారని నేను అనుకోవడం లేదు. అలాంటి వ్యక్తికి దక్కాల్సిన గౌరవం ఇంకా దక్కలేదు. ఈ రంగంలో కేంద్ర ప్రభుత్వం అందించే అత్యున్నత పురస్కారం దాదాసాహెబ్ ఫాల్కే అవార్డు ఆయనకు వచ్చేలా రెండు తెలుగు రాష్ట్ర ప్రభుత్వాలు గట్టి ప్రయత్నం చేయాలి.. నిజాయతీగా చేయాలని నేను మనస్ఫూర్తిగా కోరుకుంటున్నాను. రిక్వెస్ట్ చేస్తున్నాను.. చెప్పాలంటే డిమాండ్ చేస్తున్నాను’’ అని చిరంజీవి అన్నారు. ఆ అత్యున్నత పురస్కారం కృష్ణగారికి మాత్రమే వచ్చే గౌరవం కాదని.. మనందరికీ వచ్చే గౌరవమని చిరంజీవి అన్నారు. ‘‘కృష్ణగారు 350కి పైగా సినిమాలు చేయడం మాత్రమే కాదు.. నిర్మాత మాత్రమే కాదు.. ఆయన ధైర్య సాహసాలకు పెట్టింది పేరు. ఏదైనా ఇన్నోవేటివ్ టెక్నాలజీ వస్తే దాన్ని అడాప్ట్ చేసి మన ప్రేక్షకులకు అందించి, వాళ్లను ఆహ్లాదపరచడంలో ఆయన ఎప్పుడూ ముందుండేవారు. సినీ ఇండస్ట్రీ హైదరాబాద్‌కు రావడంలో కృషి చేసిన వ్యక్తి కృష్ణగారు. అలాగే, ఇక్కడ స్టూడియో నిర్మించారు. కాబట్టి అన్ని విధాలా దాదాసాహెబ్ ఫాల్కే అవార్డుకు అర్హుడు కృష్ణగారు’’ అని అన్నారు చిరంజీవి. కృష్ణకి దాదాసాహెబ్ ఫాల్కే అవార్డు వచ్చేలా రెండు తెలుగు రాష్ట్రాలు చిత్తశుద్ధితో ప్రయత్నించాలని తాను కోరుకుంటున్నట్టు చిరంజీవి వెల్లడించారు. అయితే, ఒకప్పుడు కృష్ణగారి అబ్బాయి మహేష్ బాబు అని.. కానీ, ఈరోజు మహేష్ బాబు సాధిస్తున్న విజయాలు, ఎదుగుతున్న విధానం చూస్తుంటే ఆయన తండ్రి కృష్ణ అని చెప్పుకునే స్థాయికి ఎదుగుతాడని చిరంజీవి అన్నారు. ఇది కృష్ణగారు గర్వించదగిన విషయం అని చెప్పారు.
from Telugu Cinema News | తెలుగు సినిమా న్యూస్ | Latest Telugu Cinema News in Telugu https://ift.tt/2FketSw
No comments:
Post a Comment