అమ్మతోడు సినిమాలే చేస్తా.. బ్లేడు గణేష్ అనొద్దు: బండ్ల ఆవేదన

తెలంగాణ ఎన్నికల సమయంలో సినీ నటుడు, నిర్మాత బండ్ల గణేష్ ఎంత పాపులర్ అయ్యారో అందరికీ తెలిసిందే. కాంగ్రెస్ నేతగా పార్టీ కోసం ప్రచారం చేసిన గణేష్.. తెలంగాణలో తమ ప్రభుత్వం ఏర్పడకపోతే బ్లేడుతో పీక కోసుకుంటానని శపథం చేశారు. ఆ తరవాత ఫలితం ఏమైందో.. బండ్ల గణేష్‌పై ఎన్ని వార్తలు వచ్చాయో చెప్పాల్సిన అవసరంలేదు. అప్పటి నుంచి బండ్ల గణేష్ కాస్త బ్లేడు గణేష్ అయిపోయారు. అయితే, ఆదివారం హైదరాబాద్ ఎల్బీ స్టేడియంలో జరిగిన ‘సరిలేరు నీకెవ్వరు’ మెగా సూపర్ ఈవెంట్‌లో ప్రేక్షకులు బండ్ల గణేష్‌ను ఓ ఆట అడుకున్నారు. మాట్లాడటానికి వేదికపైకి వచ్చిన గణేష్‌ను బ్లేడు గణేష్ అంటూ వెక్కిరించారు. దీంతో మొదట కాస్త ఫస్ట్రేట్ అయినా ఆ తరవాత కూల్‌గా చిరంజీవి, మహేష్ బాబుపై తనదైన శైలిలో ప్రశంసల వర్షం కురిపించారు. ఆ తరవాత తన ‘బ్లేడు’ దగ్గరకి వచ్చారు. Also Read: ‘‘ఎన్నో సంవత్సరాల తరవాత మా అక్క విజయశాంతి గారు, మెగాస్టార్ గారు, సూపర్ స్టార్ మహేష్ గారు, బండ్ల గణేష్ గారు ఒకే వేదికపై ఇంత అద్భుతం చేయడం ఆనందంగా ఉంది. ఈ సినిమా తరవాత నన్ను దయచేసి బ్లేడు గణేష్ అని ఎవరూ అనొద్దు. బండ్ల గణేష్ అనే పిలవండి. ఏదో తెలిసో తెలియకో టంగ్ స్లిప్పయింది. అందరూ కలిసి నన్ను ఎర్ర బీప్ అంటున్నారు. కాబట్టి ఇక నుంచి బండ్ల గణేష్‌గానే మీ అందరి ముందు ఉండాలని కోరుకుంటున్నాను’’ అని అన్నారు. చివరిగా మాట్లాడుతూ.. ‘‘ఇంతకాలం నేను తీసిన సినిమాల హీరోలు, దర్శకుల గురించి చెప్పుకునేవాడిని. ఇప్పుడు నా గురించి చెప్పుకుంటా. ఈ సినిమాలో 10 నిమిషాలు నేను కూడా చింపేశా. మీ అందరి ఆశీర్వాదంతో ఇంకా ఇంకా నటిస్తా.. సినిమాలు తీస్తా. సినిమానే నా జీవితం. వేరే విషయాలతో నాకు సంబంధం లేదు. అమ్మతోడు.. మీరు నన్ను ఏమీ అనొద్దు. ఓన్లీ సినిమా. 30 ఏళ్ల నుంచి సినిమాల్లోనే ఉన్నాను.. ఇంకో 30 ఏళ్లు ఇక్కడే ఉంటా. అమ్మతోడు ఇంకేమీ చెయ్యను’’ అని వేడుకున్నారు. అయితే, బండ్ల గణేష్ మాట్లాడుతున్నంతసేపు ఆయన ప్రతి పదానికి ‘‘ఆ.. ఆ..’’ అని ప్రేక్షకులంతా ఊకొట్టడం సరదాగా అనిపించింది.

from Telugu Cinema News | తెలుగు సినిమా న్యూస్ | Latest Telugu Cinema News in Telugu https://ift.tt/2sGvzrc