నందమూరి కళ్యాణ్ రామ్ హీరోగా న‌టించిన ఫ్యామిలీ ఎంట‌ర్‌టైన‌ర్ ‘ఎంత మంచివాడవురా!’. ‘శతమానం భవతి’ చిత్రంతో జాతీయ పురస్కారాన్ని గెలుచుకున్న సతీష్ వేగేశ్న దర్శకత్వంలో ఈ చిత్రం తెర‌కెక్కుతోంది. ఆదిత్య మ్యూజిక్ ఇండియా ప్రైవేట్ లిమిటెడ్ పతాకంపై ఉమేష్ గుప్తా, సుభాష్ గుప్తా నిర్మిస్తోన్న ఈ చిత్రానికి శ్రీదేవి మూవీస్ శివ‌లెంక కృష్ణప్రసాద్ స‌మ‌ర్పకుడిగా వ్యవహ‌రిస్తున్నారు. గోపీ సుందర్ సంగీతం సమకూరుస్తున్నారు. ప్రస్తుతం నిర్మాణాంతర కార్యక్రమాలు జరుపుకుంటోన్న ఈ చిత్రాన్ని సంక్రాంతి కానుకగా జనవరి 15న ప్రేక్షకుల ముందుకు తీసుకొస్తు్న్నారు. సతీష్ వేగేశ్న దర్శకత్వంలో వస్తోన్న ఫ్యామిలీ డ్రామా కావడంతో ఈ సినిమాపై అంచనాలు బాగానే ఉన్నాయి. అయితే, ఆ అంచనాలను రెట్టింపు చేయడానికి చిత్ర ప్రచారంలో భాగంగా ‘ఎంత మంచివాడవురా’ ప్రీ రిలీజ్ వేడుకను ఈనెల 8న నిర్వహిస్తు్న్నారు. హైదరాబాద్‌లోని జేఆర్సీ కన్వెన్షన్ సెంటర్‌లో జరిగే ఈ వేడుకకు యంగ్ టైగర్ ఎన్టీఆర్ చీఫ్ గెస్ట్‌గా విచ్చేస్తున్నారు. ‘ఎంత మంచివాడవురా!’ ప్రీ రిలీజ్ ఈవెంట్‌కు తారక్ ముఖ్య అతిథిగా విచ్చేస్తున్నారని అధికారికంగా ప్రకటన వెలువడటంతో నందమూరి అభిమానుల్లో కొత్త ఉత్సాహం వచ్చింది. వాస్తవానికి ఈ మధ్య కాలంలో ఎన్టీఆర్ ఏ ఈవెంట్‌లో పాల్గొనలేదు. అలాగే, మీడియా ముందుకు కూడా రాలేదు. కిందటేడాది ‘RRR’ ప్రెస్ మీట్‌లోనే ఎన్టీఆర్ చివరిగా కనిపించారు. దీని తరవాత మళ్లీ ఎన్టీఆర్ ఒక సినిమా ఈవెంట్‌లో పాల్గొననుండటం ఇదే. కాబట్టి, ఎన్టీఆర్ ఏ మాట్లాడతారు? అసలు ఆయన లుక్ ఎలా ఉంటుంది? అని తెలుసుకోవడానకి ఆయన అభిమానులు ఆత్రుతగా ఎదురు చూస్తున్నారు. ఇదిలా ఉంటే, ‘ఎంత మంచివాడవురా’ చిత్రంలో కళ్యాణ్ రామ్ సరసన మెహ్రీన్ హీరోయిన్‌గా నటించారు. వి.కె.న‌రేశ్‌, సుహాసిని, శరత్‌బాబు, త‌నికెళ్ల భ‌ర‌ణి, ప‌విత్రా లోకేశ్‌, రాజీవ్ క‌న‌కాల, వెన్నెల కిశోర్‌, ప్రవీణ్‌, ప్రభాస్ శ్రీను త‌దిత‌రులు ఇతర పాత్రలు పోషించారు.
from Telugu Cinema News | తెలుగు సినిమా న్యూస్ | Latest Telugu Cinema News in Telugu https://ift.tt/2trBkZH
No comments:
Post a Comment